News Georgia-ի փոխանցմամբ՝ ԱՄՆ-ը Վրաստանի հետ դիվանագիտական հարաբերություններ հաստատելուց հետո՝ 20 տարվա ընթացքում, ցուցաբերել է 3 միլիարդ դոլարի օգնություն: Այս մասին նշված է Վրաստանում ԱՄՆ դեսպանատան տարածած հայտարարությունում:
Վրաստանն ու ԱՄՆ-ը դիվանագիտական հարաբերություններ են հաստատել 1992 թվականի ապրիլի 23-ին: Այս տարի լրանալու է երկու երկրների միջև դիվանագիտական հարաբերությունների հաստատման 20-ամյակը:
Վերջին 20 տարիների ընթացքում Վրաստանն ու ԱՄՆ-ը կնքել են մոտ 45 համաձայնագիր, որոնք առնչվում են առևտրային, անվտանգության, գյուղատնտեսության, առողջապահության, կրթական ու մշակութային ոլորտներին:
Վերջին 20 տարիներին Վրաստանի ու ԱՄՆ-ի միջև ապրանքաշրջանառությունը հասել է 2.2 միլիարդ դոլարի: Միևնույն ժամանակ ԱՄՆ-ը Վրաստանին հատկացրել է 3 միլիարդ դոլարի օգնություն, որից 1 միլիարդ դոլարն ուղղվել է 2008 թվականի ռուս-վրացական պատերազմի հետևանքների վերացմանը:
2009 թվականի հունվարին էլ երկու երկրների միջև ստորագրվել է Ռազմավարական գործընկերության մասին խարտիան: