Ֆլորիդայում իր հաղթանակից ոգևորված նախագահական թեկնածու Միթ Ռոմնին ուղևորվել է դեպի Մինեսոտա և Նևադա՝ մասնակցելու այսօր կայանալիք քարոզարշավին` հայտարարելով, որ հարկավոր է մի կողմ թողնել այն մեղադրանքները, որ ինքը բավական պահպանողական չէ Հանրապետական կուսակցությունը ղեկավարելու համար:
The Washington Post-ը գրում է, որ, չնայած այս մեկնաբանություններին, նրա քննադատներն այժմ քննարկում են այն հարցը, թե արդյոք նախագահական թեկնածուն իսկապե՞ս չի մտածում տնտեսապես անապահով խավի մասին։
Ֆլորիդայում նա հայտնել էր, որ այն թեկնածուները, ովքեր հայտնում են, թե իրենք ավելի պահպանողական են, պետք է մի պահ մտածեն, թե ինչին պետք է այժմ ուշադրություն դարձնի պահպանողականը: Ռոմնին ասել էր, որ պատրաստվում է աշխատատեղեր ստեղծել միջին դասի մարդկանց համար, ովքեր հիմա պայքարում են` ավելացնելով, որ իրեն շատ աղքատներն առայժմ չեն հետաքրքրում, բայց եթե կարիք լինի, ինքն այդ հարցին կանդրադառնա: Նրա այս խոսքերը պատճառ են հանդիսացել, որ քննադատները սկսեն քննարկել դա: Սակայն իրականում նրա հաղթանակը հենց պայմանավորված է այն հանգամանքով, որ ԱՄՆ-ում շատ մարդիկ իրենց ավելի շուտ կհամարեն միջին դասի ներկայացուցիչ, քան աղքատ: