Ամերիկա-իսլամական հարաբերությունների խորհուրդը խնդրել է Թեհրանին ազատ արձակել ԱՄՆ քաղաքացի Ամիր Միրզա Հեքմեթիին, ում Իրանում մահապատժի են դատապարտել ԿՀՎ-ի հետ համագործակցելու համար։ Այս մասին տեղեկացնում է iran.ru-ն՝ վկայակոչելով Associated Press-ին:
Խնդրագիրն Իրանի գերագույն հոգևոր առաջնորդ Այաթոլլա Ալի Խամենեիին ուղարկել է կազմակերպության Միչիգանի բաժանմունքի ղեկավարը: Նա գրել է, որ իրենք պատրաստ են գնալ Իրան, եթե դա կնպաստի դատապարտյալի ազատ արձակմանը:
Ամերիկա-իսլամական հարաբերությունների խորհուրդն ԱՄՆ-ում գործող իրավապաշտպան կազմակերպություն է, այն պաշտպանում է ամերիկացի մահմեդականների շահերը:
Հեքմեթին, բացի ամերիկյանից, ունի նաև իրանական քաղաքացիություն: Նա ծառայել է ամերիկյան բանակում: Մինչև Իրանում գործունեություն սկսելը գտնվել է Աֆղանստանի ամերիկյան ռազմակայաններից մեկում:
