Դեկտեմբերի 29-ին Երևանի քաղաքապետ Կարեն Կարապետյանը հանդիպեց մայրաքաղաքի համատիրությունների նախագահներին, «Համատիրությունների մասին օրենքի» համահեղինակներին, ոլորտի խնդիրներով հետաքրքրվող հասարակական կազմակերպությունների ներկայացուցիչներին։ Ներկա էին նաև վարչական շրջանների ղեկավարները։ Հանդիպման ընթացքում Երևանի քաղաքապետը նշեց, որ համատիրությունների համակարգի կայացումը քաղաքային իշխանության համար առաջնային խնդիր է. «Ես համոզված եմ, որ եթե համատիրությունները կայանան, քաղաքապետարանի խնդիրներն ու հոգսերը կրկնակի անգամ կնվազեն»։ Քաղաքապետը աշխատանքային խորհրդակցությունն սկսեց արդյունավետ աշխատող և համեմատաբար կայացած համատիրությունների նախագահներին շնորհակալագրեր հանձնելով: «Հաջողված արդյունքներ ունեցող համատիրություններին մենք պետք է խրախուսենք ու աջակցենք, նրանք այն սաղմերն են, որոնց հիման վրա պետք է զարգանա և կայանա բնակֆոնդի կառավարման արդյունավետ համակարգը։ Մեզ համար շատ կարևոր է, որ յուրաքանչյուր շենք ունենա տեր, որը պատասխանատու կլինի այդ շենքի խնդիրների համար»,- նշեց Կարեն Կարապետյանը։ Հանդիպման ընթացքում քննարկվեցին համատիրությունների գործունեությանը վերաբերող հարցեր։ Նշվեց, որ մայրաքաղաքի 4,720 բազմահարկ շենքներց 4,419-ը ընդգրկված են համատիրություններում, մնացածը կառավարվում են շենքերի կառավարիչների և վարչական շրջանների կողմից։ Համատիրությունների նախագահներն ու վարչական շրջանների ղեկավարները քաղաքապետին ներկայացրին շենքերի կառավարմանն առնչվող հիմնական խնդրահարույց հարցերը։ Նշվեց, որ մեխանիզմների հստակեցման անհրաժեշտություն կա՝ սկսած վարձավաճարների հավաքագրումից, ներառյալ համատիրութան բյուջեի արդյունավետ և թափանցիկ օգտագործումը։ Եղան տարբեր առաջարկություններ իրավական դաշտը կատարելագործելու, բնակիչ սեփականատերերի հետ արդյունավետ աշխատանք կազմակերպելու, համատիրությունների կանոնավոր բյուջեներ ձևավորելու և այլ հարցերի վերաբերյալ։ Համատիրությունների աշխատանքը բարելավելու նկատառումով քաղաքապետը կարևորեց բնակիչների իրազեկվածության և իրավագիտակցության բարձրացումը։
Երևանի քաղաքապետարանի տեղակատվության և հասարակայնության հետ կապերի վարչություն:
