Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում դատավոր Գագիկ Պողոսյանի նախագահությամբ պետք է շարունակվեր Արտուշ Սողոմոնյանի նկատմամբ հարուցված քրեական գործով դատավարությունը:
Սակայն դատավոր Գագիկ Պողոսյանը հիվանդության պատճառով չէր եկել դատին: Դատարան չէին ներկայացել նաև վկաներից և ոչ մեկը: Այդ մասին հայտնում է Aravot.am-ը` նշելով, որ մեղադրող Արամ Ամիրզադյանն էլ գնացել է դատարան, որպեսզի միջնորդեր գործը կարճել` ամբաստանյալի մահվան պատճառաբանությամբ:
Թերթի աղբյուրի տեղեկացմամբ՝ ամբաստանյալը, որի նկատմամբ խափանման միջոց էր ընտրվել հանրապետությունից չբացակայելու ստորագրությունը` ինքնասպան է եղել:
Նա մեղադրվել էր Մրգավան գյուղի բնակիչ Հովիկ Ղազարյանի («Գազի Հովո») կողմից Ջոնիկ Աբրահամյանի նկատմամբ մահափորձ կազմակերպելու մասին ՀՀ ոստիկանության Արարատի մարզային վարչության պետ Արսեն Աբրահամյանին անանուն նամակ ուղարկելու համար:
