Հովիկ Աբրահամյան. Ամենահզոր զենքը խոսքն է

ԱԺ նախագահ Հովիկ Աբրահամյանն Ամանորի կապակցությամբ ընդունելություն էր կազմակերպել ԱԺ-ում հավատարմագրված լրագրողների համար: «Ձեր գործիքը բառն է և խոսքը։ Իմ գնահատմամբ, ամենահզոր և ազդեցիկ զենքը։ Բառը, խոսքը կարող է պաշտպանել արդարությունը, պաշտպանել գեղեցիկն ու բարին, և բառը կարող է գործել ամենամեծ անարդարությունը։
Այո, ձեր ուժը ձեր բառի և խոսքի մեջ է, բայց վստահ եմ, կհամաձայնեք ինձ հետ, որ ուժեղ և ազդեցիկ կարող է լինել միայն ճշմարիտ և անաչառ խոսքը։ Որովհետև միայն անաչառ և արդարամիտ լրատվամիջոցը կարող է ազդել հասարակական կարծիքի վրա և կարող է ձևավորել նույն այդ հասարակական կարծիքը»,- հայտարարեց Հովիկ Աբրահամյանը։ Նա մեջբերեց նաև «Մանչեսթր Գարդիանի» հրատարակիչ Սքոթ Պրեստուիչի խոսքերը. «Մեկնաբանությունները կարող են լինել ազատ, սակայն փաստերը դրանք սուրբ ճշմարտություն են, և դրանք խեղաթյուրել չի կարելի»։ Նա նշեց, թե անաչառ մամուլը թթվածնի նման է. երբ այն կա, կարծես թե չես զգում, իսկ երբ չկա, սկսում ես շնչահեղձ լինել։ «Ես ձեզ ասել եմ, որ իմ յուրաքանչյուր օրը սկսվում է ձեզ հետ շփումով։ Ես սթափ եմ վերաբերում ցանկացած, անգամ ամենաարմատական քննադատությանը, եթե այն անաչառ է և իր հիմքում ունի փաստ, այլ ոչ թե զրպարտանք։ Իսկ երբ հանդիպում եմ զրպարտանքի, հավատացեք, հումորով եմ վերաբերում, և հիշում եմ Շառլ դը Գոլին, որին երբ հարցնում են, թե ինչպես է ձեր առողջությունը, պատասխանում է՝ «Տեղյակ չեմ, ես դեռ այսօրվա մամուլին չեմ ծանոթացել»»,- ասաց Հ.Աբրահամյանը` կոչ անելով լինել հանդուրժող միմյանց տեսակետների և կարծիքների հանդեպ, սակայն նա չի ուզում հանդուրժողականություն`թերությունների հանդեպ. «Քանզի անաչառ քննադատությունը, իմ վստահ համոզմամբ, պետության գործունեությանը խթանող պարտադիր և անհրաժեշտ պայման է: Վստահ եմ, որ ձեր գործունեությունը հենց այս նպատակադրումն ունի»: