Ռուսաստանի Դաշնության նախագահ Դմիտրի Մեդվեդևը ստորագրել է օրենք, որն արգելում է դաշնության սուբյեկտների ղեկավարներին կոչել նախագահ:
Ինչպես փոխանցում է ITAR-TASS գործակալությունը, սուբյեկտների վերջին նախագահները «կվերանան» մինչև 2015թ. հունվարի 1-ը: Այդպիսիք դեռ մնացել են 12 սուբյեկտներում:
Թե ինչպես պետք է կոչվեն այդ սուբյեկտների ղեկավարները, օրենքը չի նշում, սակայն նույն օրենքում մնացել է դրույթ, համաձայն որի սուբյեկտի ղեկավարի պաշտոնի անվանումը որոշվում է ՌԴ Սահմանադրությամբ` հաշվի առնելով այդ սուբյեկտի պատմական, ազգային և այլ ավանդույթները:
Թե որքանով է այս օրենքը հակասության մեջ մտնում Սահմանադրության հետ՝ ցույց կտա ժամանակը: Պարզ չէ, որ եթե սուբյեկտներից մեկը հրաժարվի փոփոխել սուբյեկտի ղեկավարի պաշտոնի անվանումը, ինչ տեղի կունենա, քանի որ նույն օրենքի մեջ երկու տարբերակներն էլ թույլատրվում են:
«Առաջին լրատվականն» արդեն տեղեկացրել է, որ այս առաջարկությունը Չեչնիայի նախագահ Ռամզան Քադիրովինն է, որը հենց իր առաջարկի հաջորդ օրը փոփոխեց իր հանրապետության ղեկավարի պաշտոնի անվանումը: Այսուհետ նա ոչ թե Չեչնիայի նախագահն է, այլ այդ հանրապետության ղեկավարը:
