Վրացական GHN լրատվական գործակալության փոխանցմամբ՝ վրացի ընդդիմադիր միլիարդատեր, «Վրացական երազանք» շարժման հիմնադիր Բիձինա Իվանիշվիլին Facebook-ի իր էջում տեղադրված տեսաուղերձում հայտարարել է, որ ՆԱՏՕ-ին Վրաստանի անդամակցության միակ խոչընդոտը նախագահ Միխեիլ Սաակաշվիլին է.
«Բարաք Օբաման ևս մեկ անգամ հաստատեց, որ ԱՄՆ-ն աջակցում է ՆԱՏՕ-ին Վրաստանի անդամակցությանը: Մինչդեռ մեր նախագահի արձագանքն այնպիսին էր, թե լավ է, որ ԱՄՆ-ը աջակցում է ՆԱՏՕ-ին Վրաստանի անդամակցությանը:
Սակայն այդ որոշումը կախված չէ միայն ԱՄՆ-ից, այդ որոշումը կախված է նաև ՆԱՏՕ-ի անդամ երկրներից: Ինձ հայտնի չէ ՆԱՏՕ-ի որևէ անդամ երկրի անուն, որը սկզբունքային հակառակ դիրքորոշում կունենա ՆԱՏՕ-ին Վրաստանի անդամակցության հարցում: Վրաստանի բնակչության մեծ մասն աջակցում է ՆԱՏՕ-ին ինտեգրվելուն, և մենք ողջունում ենք այդ հեռանկարը:
Միակ մարդը, որը խոչընդոտում է ՆԱՏՕ-ին Վրաստանի անդամակցության գործընթացը, պարոն Միխեիլ Սաակաշվիլին է, որն իր գործողություններով հակասում է ՆԱՏՕ-ին Վրաստանի անդամակցության հեռանկարին:
Ազգային հեռուստաընկերություններն ու բազմաթիվ գաղափարախոսներ այսօր փորձում են Վրաստանի բնակչությանը համոզել, թե Օբամայի հետ հանդիպումը անձամբ Սաակաշվիլիի արժանիքն է, սակայն դա այդպես չէ:
Հեշտ է գլխի ընկնել, որ դա մեր երկրի և Վրաստանի բնակչության հանդեպ ցուցաբերված հարգանք է: Օբաման Սաակաշվիլին ասել է, թե հուսով է՝ Վրաստանում իշխանափոխությունը տեղի կունենա ժողովրդավարական ու օրինական ճանապարհով»: