РИА Новости-ի փոխանցմամբ՝ ամերիկյան կենտրոնական հետախուզական վարչության (ԿՀՎ) տնօրեն Դևիդ Պետրեուսը Սենատում տեղի ունեցած լսումների ժամանակ հայտարարել է, որ Սաուդյան Արաբիայի նավթը կարող է փոխհատուցել Իրանից արտահանվող նավթի դադարեցումից առաջանալիք նավթի դեֆիցիտը.
«Իրանի հանդեպ սահմանված պատժամիջոցները վերջին շաբաթներին սկսել են գնալով ավելի մեծ ազդեցություն թողնել: Կարծես թե Սաուդյան Արաբիայում աճում է նավթի արտադրությունը և կարող է լրացնել իրանական նավթի պակասը՝ կապված նրա հանդեպ սահմանված պատժամիջոցների հետ»:
Հիշեցնենք, որ հունվարի 23-ին ԵՄ-ի կողմից իր նավթի արտահանման վրա դրված բեռնարգելքից հետո Իրանը Նավթ արտահանող երկրների կազմակերպության (OPEC) անդամներին կոչ արեց չավելացնել իրենց նավթի արտադրությունը՝ սպառնալով, որ հակառակ դեպքում դա կդիտարկի որպես իր հանդեպ արված ոչ բարեկամական քայլ: