«Նախօրեից ՀՀԿ-ի և ԲՀԿ-ի միջև սկսված փոխհրաձգությունը, որի ընթացքում կոալիցիոն գործընկերները սպառնում էին պայթեցնել մեկը մյուսին, երեկ դադարեց»,- գրում է «ՀԺ»-ն և հավելում.
«Իշխանական մեր աղբյուրները պնդում են, որ նախօրեին նախագահական նստավայրում կոալիցիոն ուժերի ղեկավարների հետ հանդիպման ժամանակ լուրջ քննարկման առարկա է դարձել նույն օրվա հեռակա վեճը, երբ ՀՀԿ-ն ԲՀԿ-ին էր «փուչիկ» ասում և սպառնում պայթեցնել, ԲՀԿ-ն էլ` ՀՀԿ-ին:
ՀՀԿ-ն և ԲՀԿ-ն պայմանավորվել են, որ այսուհետ բանավիճելու են կոռեկտության շրջանակներում՝ առանց փոխադարձ վիրավորանքների: Արդեն երեկ առավոտյան ՀՀԿ խոսնակ էդուարդ Շարմազանովը հայտարարեց, թե ՀՀԿ-ն իրեն կոռեկտ է պահել, բայց միևնույն ժամանակ էլ նշեց, թե ՀՀԿ-ին ոչ ոք չի կարող պայթեցնել, որովհետև բոլորը հասկանում են, որ ՀՀԿ-ին պայթեցնելը վտանգավոր է»:
Թերթի աղբյուրները նշում են, որ նախօրեի երեկոյան ՀՀԿ-ում ևս լուրջ քննարկում է եղել ԲՀԿ-ի հետ սկսված հեռակա կռվի կապակցությամբ:
«Հանրապետականները խիստ նեղսրտել են ԲՀԿ խմբակցության պատգամավոր Նաիրա Զոհրաբյանի այն հայտարարությունից, որ ՀՀԿ-ի խոսքի ու գործի անհամապատասխանության վերաբերյալ հատորյակներ կարելի է գրել: Թե որքան կտևի կոալիցիոն գործընկերների միջև հաստատված հարաբերական անդորրը, դժվար է ասել»:
