Գիտնականները զգուշացնում են, որ սրտային հիվանդությունների հավանականությունը կրկնապատկվում է այն դեռևս չծնված երեխաների մոտ, որոնց մայրերն ավելորդ քաշի հետ կապված խնդիրներ ունեն և նաև հաճախակի ծխում են:
Ինչպես գրում է Daily Mail-ը, հետազոտության արդյունքում պարզվել է, որ կանայք, ովքեր ունեն այս երկու ռիսկային գործոնները, երկու անգամ ավելի հավանական է, որ կծննդաբերեն սրտային հիվանդություններ ունեցող երեխաների: Հետազոտողները կարծում են, որ սա կապված է լավ և վատ խոլեստերինի անհավասար մակարդակների հետ:
Արյան մեջ խոլեստերինի մակարդակների անհավասարությունը կարող է գիրության և ծխելու հետևանք լինել: Ծխելը հանգեցնում է վատ խոլեստերինի մակարդակի բարձրացմանը, մինչդեռ արյան մեջ լավ խոլեստերինի մակարդակը նվազում է, որն էլ իր հերթին հանգեցնում է սրտային հիվանդությունների առաջացմանը:
Ուսումնասիրություններն անցկացրել են Նիդեռլանդների Գրոնինգեն համալսարանի գիտնականները: Նրանք հայտնում են, որ կանայք պետք է գիտակցեն, որ վատ սովորությունների պատճառով կարող են վտանգել իրենց երեխայի առողջությունը:
