Թուրքագետ Արտակ Շաքարյանը մամուլի ասուլիսի ժամանակ հայտարարեց, որ ԱՄՆ-ում մտմտում են այլընտրանքային տարբերակ, որը Ադրբեջանին մոռացնել կարող է տալ Լեռնային Ղարաբաղը: «Հայաստանը բացում է սահմանը Նախիջևանի հետ, Թուրքիան բացում է սահմանը Հայաստանի հետ: Երևանը թույլ է տալիս, որ երկաթգիծը Կարսով մտնի Գյումրի, սրանով Հայաստանը ապաշրջափակում է Նախիջևանը, և Թուրքիան ապաշրջափակում է Հայաստանը»,-ասաց նա: Նա կարծիք հայտնեց, որ հազիվ թե Ռեջեփ Թայիփ Էրդողանը թույլ տա, որ հայ-թուրքական հարաբերություններում մոռացվի ԼեռնայինՂարաբաղի հարցը: Ինչ վերաբերում է հայ-թուրքական արձանագրություններով նախատեսված` պատմաբանների հանձնաժողով ստեղծելու դրույթին, ապա Արտակ Շաքարյանը կարծիք հայտնեց, որ ինքը դեմ չէ դրան: «Ոչ թե պետք է քննարկել` Ցեղասպանություն եղե՞լ է, թե՞ ոչ, այլ այն հարցերը, թե ինչպես է տեղի ունեցել, դա բերո՞ւմ է փոխհատուցման, թե՞ չի բերում, Անկարա՞ն է պատասխանատու, թե՞ այն տերությունները, որոնք հայկական հարցի վրա ֆինանսավարկային գործունեություն են ծավալում»,- ասաց Արտակ Շաքարյանը: «Առաջին լրատվական»-ի հարցին, թե ԱՄՆ-ում հատկապես ովքեր են առաջարկված տարբերակի հեղինակները, Արտակ Շաքարյանն ասաց, որ Վաշինգտոնի համալսարանների միջազգային հարաբերությունների մասնագետները: Նա հավելեց, որ այդ տարբերակի կողմնակիցներն այն մարդիկ են, որոնք կա՛մ նախկինում աշխատել են Պենտագոնում, կա՛մ էլ մեկ-երկու տարի անց պետք է աշխատեն Պենտագոնում: «Դա կարելի է ասել, որ որոշում կայացնող էլիտայի տարբերակներից մեկն է»,-ասաց նա: «Առաջին լրատվականը» Արտակ Շաքարյանից հետաքրքրվեց, թե արդյոք այդ տարբերակի կյանքի կոչվելու դեպքում Հայաստանը չի կորցնի իր հարավային սահմանը, եթե նկատի ունենանք, որ մեր երկիրը գտնվում է տնտեսապես բավականին թույլ վիճակում: «Խոսքը Կարս-Երևան-Նախիջևան երկաթգծի բացման մասին է: Միմիայն: Գոբլի պլանը չի քննարկվում ոչ մի դեպքում: Միայն երկաթուղին է բացվելու»,- ասաց թուրքագետը: Արտակ Շաքարյանից հետաքրքրվեցինք, թե ինչ կշահի Հայաստանն այդ դեպքում: «Մենք կշահենք Թուրքիայի հետ համեմատաբար բաց սահման, եվրոպական շուկաներ, Մերձավոր Արևելքի շուկա»,- ասաց թուրքագետը: Նա երկաթգծի հնարավոր գործարկման տարբերակը համարեց շատ մեղմ քայլ` համեմատելով այն Երևան-Ստամբուլ չվերթի բացման հետ: