Վրաստանի եվրոպական և եվրաատլանտյան կառույցներին ինտեգրացման հարցերով պետնախարար Գեորգի Բարամիձեն հայտարարել է, որ 2010 թվականը Վրաստանի համար կարևոր էր միջազգային այն աջակցության տեսանկյունից, որը նրան ցուցաբերեց ինչպես ԵՄ-ն, այնպես էլ ՆԱՏՕ-ն, հայտնում է Новости-Грузия-ն:
«Եվրամիության և ՆԱՏՕ-ի աջակցությունը պայմանավորված է այն հաջող բարեփոխումներով, որոնք ընթացիկ տարում իրագործվեցին Վրաստանում»,- ասել է Բարամիձեն: Նրա խոսքով, ՆԱՏՕ-ն արդեն երկրորդ անգամ դրական գնահատական է տալիս Վրաստանում իրագործվող բարեփոխումներին, ինչը ՆԱՏՕ-ի գագաթնաժողովում Վրաստանին լրջորեն աջակցության հիմք հանդիսացավ:
Խոսելով Եվրամիության հետ հարաբերությունների մասին` Բարամիձեն նշել է, որ այդ ուղղությամբ կա դրական գնահատական, ինչը դրսևորվել է Եվրամիության կոնկրետ քաղաքական որոշումներով, մասնավորապես անցագրային ռեժիմի պարզեցման, ինչպես նաև ազատ առևտրի և ասոցիացված անդամության շուրջն ընթացող բանակցություններով: Բարամիձեն նշել է, որ Վրաստանի համար շատ կարևոր է 2011-ին բարեփոխումների քաղաքականության շարունակումը: