ՌԴ Վերստուգիչ պալատի կատարած ստուգումների արդյունքում բացահայտվել է, որ Աբխազիան 2010 թվականին գրեթե 37 տոկոսով պակաս միջոցներ է ստացել Ռուսաստանի հատկացրած օգնությունից, որը նախատեսված է հանրապետության սոցիալ-տնտեսական զարգացման համար:
Ինչպես հաղորդում է Наша Абхазия-ն, այս մասին տեղեկատվություն է տարածել ՌԴ Վերստուգիչ պալատը: Վերջինիս տվյալներով, 2009-2010թթ. Ռուսաստանի դաշնային բյուջեից Աբխազիայի Հանրապետության համար միջոցներ էին նախատեսված 7,3 մլրդ ռուբլի գումարի չափով, այդ թվում 2,4 մլրդ ռուբլին՝ 2009-ի, իսկ 4,9 մլրդ ռուբլին` 2010-ի համար:
«Անցած ժամանակաշրջանում Աբխազիայի Հանրապետությունում մեծ աշխատանք է կատարվել բնակկենցաղային և տրանսպորտային ենթակառուցվածքի վերականգնման և արդիականացման, սոցիալական և մշակութային նշանակության օբյեկտների նորոգման ուղղությամբ»,- ասված է համապետական բյուջեի միջոցների ծախսման ստուգման արդյունքների վերաբերյալ տարածված մամլո տեղեկագրում:
