2010թ. ճանապարհատրանսպորտային կանոնների խախտման դեպքերը 2009թ. համեմատությամբ աճել են: Ճանապարհային ոստիկանության պետ, ոստիկանության գնդապետ Մարգար Օհանյանը լրագրողների հետ հանդիպման ժամանակ տեղեկացրեց, որ 2010թ. ճանապարհատրանսպորտային կանոնների խախտման համար կազմվել է 725,700 արձանագրություն, իսկ 2009-ին` 672,930: Աճել է ամրագոտի չկապելու համար կազմված արձանագրությունների թիվը: Եթե 2009-ին ամրագոտի չկապելու համար տուգանվել է 44,691, ապա 2010-ին այդ թիվն հասել է 111,123-ի: Ավտոմեքենայի ղեկին հեռախոսով խոսելու համար 2009-ին տուգանվել է 40,385 վարորդ, 2010-ին` 58,012: Ավտոմեքենայի պատուհանից ծխախոտ կամ աղբ նետելու համար տուգանվել է 273 վարորդ, 2010-ին` 2150: Ոչ սթափ վիճակում ավտոմեքենա վարելու համար տուգանվողների թիվը ևս 2009-ի համեմատ 2010-ին աճել է. 2009-ին տուգանվել է 3,212, իսկ 2010-ին` 20,107 վարորդ: Հետիոտները ևս տուգանվել են ճանապարհային ոստիկանության աշխատակիցների կողմից. մասնավորապես, փողոցը սխալ տեղով հատելու համար 2009-ին տուգանվել է 6,886 հետիոտն, իսկ 2010-ին` 22,108:
Մարգար Օհանյանը նաև տեղեկացրեց, որ 2010թ. պատասխանատվության է ենթարկվել նաև ճանապարհային ոստիկանության 37 աշխատակից. 7 ծառայող համակարգից հեռացվել է, իսկ 24-ը կարգապահական պատասխանատվության է ենթարկվել: