BBC-ի ռուսական ծառայության փոխանցմամբ՝ ԱՄՆ նախագահ Բարաք Օբաման երեկ Սպիտակ տանն ընդունել է Վրաստանի նախագահ Միխեիլ Սաակաշվիլին և նրա ներկայութամբ սխալմամբ Վրաստանն անվանել է Ռուսաստան:
Հանդիպման ժամանակ խոսք է գնացել Վրաստանում ինքնիշխան ու ժողովրդավարական պետության կառուցման մասին, ինչը հնարավոր է դարձել «Վարդերի հեղափոխության» շնորհիվ: Մտազբաղ Օբաման, ինչ-որ տեղ նայելով, հայտարարել է.
«Իմ առաջին քայլերից մեկը եղել է շնորհակալություն հայտնելը քաղաքացիական հասարակության այն ինստիտուտների կազմավորման համար, որն ընթանում է Ռուսաստանում …»: Ապա Օբաման ուղղել է իր սխալը՝ նշելով. «Այսինքն՝ Վրաստանում»:
Հանդիպումից հետո տեղի ունեցած կարճատև ճեպազրույցի ժամանակ Օբաման հավելել է. «Ես ցանկանում եմ նախագահ Սաակաշվիլիին ասել, որ մենք ողջունում ենք ժողովրդավարության ու թափանցիկության այն մոդելը, որը նա հաստատել է ոչ միայն իր երկրում, այլև՝ ընդհանրապես ողջ տարածաշրջանում:
Մենք հուսով ենք, որ հետագա մի քանի տարիներին առաջընթացի պահպանման դեպքում շատ այլ երկրները կհավատան, որ եթե Վրաստանը կարողացել է այդպիսի վերափոխումներ անցկացնել, ապա իրենք նույնպես կարող են դա անել»: