News Georgia-ի փոխանցմամբ՝ երկօրյա այցով Վրաստան այցելած՝ Աֆղանստանում գործող Միջազգային անվտանգության աջակցության ուժերի (ISAF) և ամերիկյան զորքերի հրամանատար, գեներալ Ջոն Ալենը դրականորեն է գնահատել վրացի զինծառայողների նախապատրաստման աստիճանը:
Վրաստանում նա հանդիպել է Պաշտպանության նախարար Բաչո Ախալայայի հետ: Հանդիպման ժամանակ կողմերը քննարկել են ISAF-ի խաղաղապահ գործողություններում վրացական ստորաբաժանումների մասնակցության և վրաց-ամերիկյան ռազմական համագործակցության հարցերը:
Ամերիկացի գեներալն այցելել է նաև Վրաստանի զինված ուժերի 23-րդ հետևակային գումարտակ, որը պատրաստվում է առաջիկայում մեկնել Աֆղանստան: Այնտեղ նա հայտարարել է, որ վրացի խաղաղապահները վայելում են բարձր հեղինակություն, և որ Աֆղանստանը, միջազգային հանրությունն ու ՆԱՏՕ-ն երբեք չեն մոռանա այդ գործողություններին Վրաստանի մասնակցությունն ու ունեցած դերակատարությունը:
Հիշեցնենք, որ Վրաստանը ISAF-ի գործողություններում ներգրավվել է 2009 թվականի օգոստոսի 6-ից։ Նախորդ տարվա դեկտեմբերի 20-ին Վրաստանի խորհրդարանը հաստատեց նախագահ Միխեիլ Սաակաշվիլիի՝ ևս մեկ գումարտակ Աֆղանստան ուղարկելու նախաձեռնությունը։
Դրա արդյունքում այս տարի Աֆղանստանում գտնվող վրացի զինծառայողների քանակը կհասցվի 1600-ի, որով և Վրաստանը կհանդիսանա ՆԱՏՕ-ի անդամ չհանդիսացող երկրների թվում Աֆղանստանում ամենամեծ զինվորական կոնտինգենտ ունեցող երկիրը։
