Cosmopolitan ամսագրի նախկին գլխավոր տնօրեն Հելեն Գարլի Բրաունը 30 միլիոն դոլար է նվիրաբերել Կոլումբիա և Սթենֆորդ համալսարաններին լրագրության ինստիտուտ ստեղծելու համար: Այս մասին հայտնում է Reuters գործակալությունը:
Մեդիա նորամուծությունների ինստիտուտը (Institute for Media Innovation) ստեղծվելու է խմբագրի մահացած ամուսնու` հայտնի կինոպրոդյուսեր Դևիդ Բրաունի պատվին:
Մեդիա նորամուծությունների ինստիտուտի ստեղծման նպատակներից է նոր մեդիայի առաջքաշումը, ինչպես նաև «լրագության և տեխնոլոգիաների միջև կապի` օրեցօր մեծացող կարևորությունը»:
Նոր ինստիտուտի ստեղծման համար հատկացվելու է 12 միլիոն դոլար: Նյու Յորքում գտնվող Կոլումբիայի համալսարանի լրագրության դպրոցի համար Հելեն Գարլի Բրաունի նվիրատվությունը պատմության մեջ ամենախոշորն էր:
Կոլումբիայի համալասրարանը ևս վեց միլիոն ստանալու է Cosmopolitan-ի նախկին խմբագրից նոր ինստիտուտի ուսուցման կենտրոն ստեղծելու համար: