ԱՄՆ նախագահ Բարաք Օբաման պաշտոնապես հաստատել է, որ ամերիկյան անօդաչու սարքերը հարվածներ են հասցրել Պակիստանի տարածքում: Ինչպես հայտնում է France-Presse գործակալությունը, Օբաման այս մասին հայտարարել է Google+ և YouTube ռեսուրսներում ունեցած մամուլի ասուլիսների ժամանակ: Մինչ այժմ այս գործողությունները չէին քննարկվել ԱՄՆ պաշտոնատար անձանց կողմից:
Օբամայի խոսքերով՝ բազմաթիվ հարվածներ են հասցվել «Ալ-Քաիդայի» և «Թալիբան» շարժման զինյալներին Աֆղանստանին սահմանակից շրջաններում, որոնք բնակեցված են առանձին ցեղերով և գրեթե չեն վերահսկվում Պակիստանի կենտրոնական իշխանությունների կողմից:
Մամուլի տվյալներով՝ 2011 թվականին Պակիստանի սահմանային շրջաններին հասցվել է 64 հրթիռային հարված, մինչդեռ 2010 թվականին` 101 հարված:
ԱՄՆ բանակը մտադիր է իր հետագա գործողություններում կիրառել անօդաչու սարքեր՝ հատկապես հաշվի առնելով այն փաստը, որ արևմտյան կոալիցիան, ԱՄՆ գլխավորությամբ, մտադիր է Աֆղանստանում իր ռազմական գործողություններն ավարտել 2014 թվականին:
2011 թվականի վերջին ԱՄՆ-ն ստիպված էր ժամանակավորապես դադարեցնել անօդաչու սարքերի կիրառումը Պակիստանի հետ հարաբերությունների խիստ վատացման պատճառով. Աֆղանստանի սահմանային անցակետում 2011 թվականի նոյեմբերի 26-ին ՆԱՏՕ-ի օդային հարձակումից հետո զոհվել էր 24 պակիստանցի զինծառայող:
