«Ամերիկայի Ձայն»-ի հաղորդմամբ՝ Հանրապետական կուսակցությանը սատարող ընտրողները երեքշաբթի օրը կմասնակցեն Ֆլորիդա նահանգում կայանալիք նախնական ընտրություններին, որոնք կարող են առանցքային դառնալ Հանրապետական կուսակցության կողմից նախագահական թեկնածու առաջադրելու պայքարում:
Ֆլորիդայում կայանալիք նախագահական նախնական ընտրությունների ընթացքում քվեարկողներն ընտրություն կկատարեն չորս թեկնածուների միջև, սակայն նահանգի Օռլանդո քաղաքից «Ամերիկայի Ձայն»-ի թղթակիցը հաղորդել է, որ ընտրողներին հիմնականում մտահոգում են երկրի տնտեսական վիճակի հետ կապված խնդիրները:
Ըստ հասարակական հարցումների արդյունքների՝ առաջատար դիրքերում գտնվում է Միթ Ռոմնին:
Քվինիփեք համալսարանի Հասարակության կարծիքի հարցումների ինստիտուտի կողմից Ֆլորիդայի ընտրողների շրջանում անցկացված հարցման արդյունքների համաձայն՝ Ռոմնիի օգտին իրենց ձայները տալու հավանականության մասին հայտնել է ընտրողների 43 տոկոսը, իսկ իր ամենամոտ մրցակից՝ ԱՄՆ Ներկայացուցիչների պալատի նախկին խոսնակ Նյութ Գինգրիչի օգտին՝ 29 տոկոսը:
Երկու թեկնածուները բավականին կոշտ ընտրապայքար են վարում ԱՄՆ հարավարևելյան նահանգում:
Միթ Ռոմնիին անհրաժեշտ է հաղթանակ տանել Ֆլորիդայում՝ Հարավային Կարոլինա նահանգում հունվարի 21-ին Գինգրիչին պարտվելուց հետո նախընտրական պայքարում թուլացած իր դիրքերը վերականգնելու համար:
Գինգրիչը երկուշաբթի օրը դատապարտել է Ռոմնիին ազատական լինելու և քաղաքական անազնիվ գովազդ կիրառելու մեջ: Այս մեղադրանքները բարձրաձայնելուց մեկ օր առաջ ԱՄՆ Ներկայացուցիչների պալատի նախկին խոսնակը Ռոմնիին անվանել է «աբորտների, զենքի տիրապետման վերահսկողության և հարկերի բարձրացման կողմ հանդես եկող՝ չափավոր հայացքների տեր մասաչուսեթսցի»:
Ռոմնին, խոսելով Գինգրիչի մասին, ավելի վաղ նշել է, որ վերջինս փորձում է արդարություն գտնել ընտրարշավի ընթացքում, և հիշեցրել, որ Գինգրիչը նախկինում մեղավոր է ճանաչվել էթիկայի կանոնների խախտումների համար, որոնց պատճառով ստիպված է եղել հրաժարական ներկայացնել ԱՄՆ Ներկայացուցիչների պալատի խոսնակի պաշտոնից: