Մամեդյարովը` Ադրբեջան-արաբական երկրներ հարաբերությունների մասին

Երեկ Ադրբեջանի արտգործնախարար Էլմար Մամեդյարովը հարցազրույց է տվել լիբանանյան «Al-Havadis» ամսագրին, որում հայ-ադրբեջանական հարաբերություններից բացի ներկայացրել է նաև իր տեսլականը ադրբեջանա-արաբական հարաբերությունների վերաբերյալ: «Ադրբեջանը միշտ հատուկ նշանակություն է տվել արաբական երկրների հետ տարբեր ոլորտներում հարաբերությունների զարգացմանը»,- ասել է Է.Մամեդյարովը՝ նշելով այդ երկրների հետ Ադրբեջանի կրոնական և մշակութային սերտ առնչությունները: «Այսօր արաբական երկրների հետ մեր կապերը հաջող զարգանում են տարբեր ոլորտներում` քաղաքական, տնտեսական և մշակութային: Այս պահին արաբական երկրների մեծ մասում գործում են ադրբեջանական դեսպանատներ: Եգիպտոսը, Սաուդյան Արաբիան, Հորդանանը, Քաթարը, Քուվեյթը, Լիբիան, Մարոկկոն, Իրաքը և Պաղեստինն իրենց ներկայացուցչություններն ունեն Բաքվում: Ակնկալվում է, որ մոտ ժամանակներում մյուս արաբական երկրների դեսպանատները նույնպես կգործեն»,- ասել է Մամեդյարովը` հավելելով, որ Ադրբեջանի նախագահ Իլհամ Ալիևի որոշումը արաբական երկրներում դեսպանատներ բացելու վերաբերյալ խոսում է այն մասին, որ այդ երկիրը մեծ նշանակություն է տալիս արաբական երկրների հետ հարաբերությունների որակական փոփոխություններին:
Նա նշել է, որ շփումները տեղի են ունենում ոչ միայն երկրների ղեկավարների, այլև տարբեր գերատեսչությունների ղեկավարների մակարդակով:
Մամեդյարովը կրկին իր աջակցությունն է հայտնել Պաղեստինի ժողովրդին` նշելով, որ այդ օգնությունը կլինի նաև ապագայում:
Նա խոսել է արաբական երկրների և Ադրբեջանի փոխհարաբերությունների մասին Իսլամական կոնֆերանս կազմակերպության (ԻԿԿ) շրջանակներում` նշելով, որ Ադրբեջանը ներկայացրել է իր թեկնածությունը ԻԿԿ-ում 2014թ. նախագահությունը ստանձնելու համար:
Նա բարձր է գնահատել արաբական երկրների դիրքորոշումը Հայաստանի հետ հակամարտության գործում (չնշելով, թե հատկապես արաբական որ երկրներին է դա վերաբերում – 1in.am): Ըստ Ադրբեջանի արտգործնախարարի՝ տնտեսական ոլորտում կապերի աշխուժացումն այսօր Ադրբեջանի քաղաքական օրակարգում է: Դա վերաբերում է հատկապես նավթային ոլորտին:
Մամեդյարովը ներկայացրել է նաև իր կարծիքը մերձավորարևելյան կարգավորման և Իսրայելի հետ հարաբերութոյւնների մասին: Նա նշել է, որ հրեաները վաղուց բնակություն են հաստատել Ադրբեջանի տարածքում, և չնայած այն փաստին, որ նրանք վերջին շրջանում լքել են Ադրբեջանը, սակայն կապերը չեն խզում: Բացի այդ Իսրայելը եղել է առաջին պետություններից, որ ճանաչել է Ադրբեջանի անկախությունը: Միաժամանակ, նա խոսել է Իսրայելի կողմից օկուպացված սիրիական Գոլանի բարձունքների մասին` նշելով, որ պաշտպանում է Սիրիայի քաղաքականությունը տարածքային ամբողջականությունը վերականգնելու ուղղությամբ: