Грузия Online-ի փոխանցմամբ՝ Վրաստանի նախկին նախագահ Էդուարդ Շևարդնաձեն լրագրողների հետ զրույցում հայտարարել է, որ ԱՄՆ-ը Վրաստանում չի տեղակայի հակահրթիռային պաշտպանության (ՀՀՊ) համակարգ.
«Եթե Վրաստանի իշխանությունները համաձայնեն մեր երկրի տարածքը տրամադրել ամերիկյան հենակետի ստեղծման համար, ապա դա խիստ բացասական արձագանք կառաջացնի ոչ միայն Իրանի, այլև՝ Ռուսաստանի կողմից:
Կարծում եմ, որ Սաակաշվիլին չպետք է համաձայնի Վրաստանում հրթիռների տեղակայմանը: Ես ավելի մեծ հույսեր ունեմ, որ ամերիկյան իշխանությունները նրան չեն հարկադրի այդ հարցում, քանի որ ԱՄՆ-ում քաջ գիտեն, որ դա կառաջացնի Ռուսաստանի բացասական արձագանքը:
Եթե վերջիվերջո Վրաստանում տեղակայվեն ամերիկյան հրթիռներ, ապա դա տեղի կունենա միայն Ռուսաստանի համաձայնության և Ռուսաստանի ու ԱՄՆ-ի միջև համապատասխան պայմանավորվածության ձեռքբերման պարագայում»:
Հիշեցնենք, որ ԱՄՆ նախագահ Բարաք Օբաման այսօր Սպիտակ տանն ընդունելու է Վրաստանի նախագահ Միխեիլ Սաակաշվիլիին և ամենայն հավանականությամբ բարձրացնելու է Իրանի հարցը: