Իրանական Fars News լրատվական գործակալության փոխանցմամբ՝ Իրանի նախագահ Մահմուդ Ահմադինեժադը Թեհրանում տեղի ունեցած «Իսլամի զարթոնքը և երիտասարդությունը» խորագրով միջազգային կոնֆերանսի ժամանակ հայտարարել է, որ գերտերությունները պատմության ընթացքում ձգտել են խոչընդոտներ հարուցել արդարության իրականացմանը.
«Եթե մենք հետևենք ներկայիս զարգացումներին, ապա կտեսնենք, որ գերտերությունները իրականացնում են իրենց չար պլանները՝ միլիոնավոր մարդկանց դատապարտելով տանջանքների՝ որպես փախստականներ: Այսօր աշխարհում «արդարության» քողի տակ հարձակվում են երկրների վրա:
Այսօր Արևմուտքը, փոխելով իր կարգախոսը, սեփական գաղութատիրական քաղաքականությունն իրականացնում է «ժողովրդավարության և մարդու իրավունքների պեշտպանության» քողի տակ: Բոլոր խնդիրները բխում են Իսրայելից: Այդ ռեժիմի միայն գոյությունը հակասում է մարդկությանը:
Բուն ԱՄՆ-ում գոյություն ունի միայն 2 կուսակցություն. էլ ի՞նչ ժողովրդավարության մասին է խոսքը: Ժողովրդավարությունը մեր տարածաշրջան չի կարող բերվել ամերիկյան ավիակիրների միջոցով: Նախորդ տարի տարածաշրջանի երկրներին վաճառվել է 6 միլիարդ դոլարի սպառազինություն: Մի՞թե ժողովրդավարությունը հաստատվում է զենքի միջոցով:
Այսօր թշնամին ձգտում է հարվածել Սիրիային, իսկ վաղը նրա թիրախում կհայտնվենք մենք: Նրանց ժողովրդավարությունը սիոնիստների կողմից ղեկավարվող ռեժիմն է: Արևմուտքը հետ է նահանջել իր ժողովրդավարության սկզբունքներից»:
