Միավորված աշխատանքային կուսակցության (ՄԱԿ) նախագահ Գուրգեն Արսենյանն «Ազատություն» ռադիոկայանի հետ զրույցում չի հերքել լուրերը, թե առաջիկա խորհրդարանական ընտրություններին հնարավոր է՝ մասնակցի «Բարգավաճ Հայաստան» կուսակցության (ԲՀԿ) համամասնական ցուցակով:
«Նման լուրեր պտտվում են, ճիշտ են, թե չէ` սպասեք համագումարի հայտարարությանը, համագումարից հետո կերևա»,- նշել է Արսենյանը։
Նրա խոսքով` իր կուսակցության համագումարում, որը տեղի կունենա փետրվարի 27-ից մինչև մարտի 2-ը ընկած ժամանակահատվածում, պարզ կդառնա իր ու իր կուսակիցների մասնակցության ձևաչափը. «Համագումարը կարող է որոշում ընդունել, որ չենք մասնակցում, համագումարը կարող է որոշում ընդունել` մասնակցում ենք, համագումարը կարող է որոշում ընդունի` դաշինք կազմել, համագումարը կարող է որոշում ընդունել` մեծամասնականներ առաջադրել կամ արգելել»։
Բայց այն, որ Գ. Արսենյանը որոշել է վերադառնալ ակտիվ քաղաքականություն, այլևս փաստ է: Մնում է ճշտել ձևաչափը, որը կախված կլինի ոչ միայն համագումարի որոշումից, այլև քաղաքական իրավիճակի առանձնահատկություններից: Կուսակցությունում այժմ ուսումնասիրում են քաղաքական վիճակը։
«Խորհրդարանական ընտրությունների նախաշեմին ՄԱԿ-ը սկսել է ակտիվացնել քաղաքական գործունեության աստիճանը։ Նպատակը հենց խորհրդարանում քաղաքական ներկայություն ունենալն է։ Որոշումը կկայացնի` ելնելով երկրում ձեւավորված նախընտրական վիճակից»,-«Ազատություն» ռադիոկայանին ասել է ՄԱԿ-ի առաջնորդը։
«Ուսումնասիրում ենք, քննարկում ենք, վերլուծում ենք նախընտրական քաղաքական վիճակը։ Վերջ ի վերջո, մենք, լինելով քաղաքական կուսակցություն ու լինելով ողջամիտ մարդիկ, պետք է կարողանանք գտնել առավելագույն օգտակար գործողության գործակից ունեցող մեխանիզմը։ Հո մենակ չենք մասնակցում մասնակցելու համար։ Այսինքն` մեր մասնակցությունը ի սկզբանե նպատակ ունի քաղաքական ներկայություն ապահովել խորհրդարանում»,- ընդգծել է Արսենյանը։
Միավորված աշխատանքային կուսակցությունը 5 տարի առաջ` 2007թ. խորհրդարանական ընտրություններին հավաքելմ է շուրջ 59 հազար ձայն` այդպիսով չանցնելով խորհրդարան: Դրանից հետո Գուրգեն Արսենյանի թիմի ակտիվությունը նվազել էր:
Անցյալ հոկտեմբերին Արսենյանը հայտնվել է Երևանի քաղաքապետարանի հետ հակասությունների մեջ:
Քաղաքապետարանը, մասնավորապես, ապամոնտաժել էր նրան պատկանող ընկերության գովազդային վահանակները` պնդելով, թե դրանք անօրինական են տեղադրված:
Արսենյանն էլ բողոքել էր քաղաքային իշխանություններից` մտադրություն հայտնելով դիմել դատարան:
