Կենցաղային էլեկտրոնիկայի և տեխնիկայի աշխարհի խոշորագույն արտադրող Philips ընկերությունը 2011 թվականի չորրորդ եռամսյակը և ամբողջ 2011 թվականն ավարտել է խոշոր կորուստներով` չնայած մեկ տարի առաջ ունեցած շահույթին: Այս մասին ասվում է ընկերության կայքի հաղորդագրության մեջ:
Համաձայն հաշվետվության՝ հոկտեմբեր-դեկտեմբեր ամիսներին եվրոպական հսկան ունեցել է 160 միլիոն եվրոյի կորուստ՝ 2010 թվականի այս նույն ժամանակահատվածում ունեցած 465 միլիոն եվրո շահույթի դիմաց: 2011 թվականին Philips-ի կորուստները կազմել է 1,29 միլիարդ եվրո (2010 թվականին ունեցել է 1,45 միլիարդ եվրո շահույթ):
Philips-ի հաղորդագրության մեջ նշվում է, որ այս արդյունքները բացատրվում են Եվրոպայում պարտքային խնդիրներով և այս ֆոնի վրա անցկացվող տնտեսական ծրագրերով, որոնք խիստ թուլացնում են սպառողական պահանջարկը և բացասական են ազդում բնակչության՝ գնումներ կատարելու կարողունակության վրա:
Միևնույն ժամանակ Philips-ի եկամուտը աճել է մինչև 6,71 միլիարդ եվրո չորրորդ եռամսյակում (+3,3%) և մինչև 22,58 միլիարդ եվրո մեկ տարում (+1,3%): Ավելի վաղ ընկերությունը նախազգուշացրել էր, որ 2011 թվականի չորրոդ եռամսյակի օպերացիոն շահույթի ցուցանիշը զգալիորեն ցածր է՝ նախորդ տարվա նույն ժամանակահատվածի համեմատ:
Վերլուծաբանները սպասում էին, որ 2011 թվականի չորրորդ եռամսյակում Philips-ը, ամենայն հավանականությամբ, կստանար 66 միլիոն եվրո շահույթ: Ընկերության վաճառքի ծավալը, Thompson Reuters վերլուծաբանների կարծիքով, եռամսյակի արդյունքերով կազմելու էր 6,627 միլիարդ եվրո: