Օքլենդի ոստիկանությն կողմից ձերբակալված «Գրավեք Օքլենդը» ակցիայի մասնակիցների թիվն անցնում է 400-ից: Այս մասին հաղորդում է Associated Press-ը:
Ավելի վաղ հաղորդվում էր 100 ձերբակալվածների մասին:
Բացի այդ, բախումների ժամանակ վիրավորվել են ոստիկանության երեք աշխատակից և մեկ ցուցարար: «Գրավեք Օքլենդը» շարժման մասնակիցներն ավելի վաղ խոստացել էին գրավել լքված շենքերից մեկը, որտեղ նրանք պատրաստվում էին տեղավորել շարժման գրասենյակը, ինչպես նաև ուշադրություն հրավիրել անտունների վրա:
Օքլենդում ոստիկանության հետ բախումներն այս տարի առաջին դեպքն են, երբ ցուցարարները փորձում են հանրության ուշադրությունը հրավիրել իրենց վրա:
«Օքլենդի իշխանությունները ողջունում են խաղաղ բնույթի հավաքները և խոսքի ազատությունը, սակայն բռնության գործողությունները, սեփականության ավերումը և հասարակական վայրերում մարդկանց գիշերելը անթույլատրելի են»,- ասվում է Օքլենդի ոստիկանության հայտարարության մեջ, որը մեջբերում է «Ամերիկայի ձայնը»:
«Գրավեք» շարժումը սկսվել է անցյալ տարվա սեպտեմբերին Նյու Յորքում, այնուհետև տարածվել ԱՄՆ-ի և աշխարհի մի շարք քաղաքներում: Շարժման մասնակիցները բողոքում են ֆինանսական ինստիտուտների չարաշահումների և սոցիալական անհավասարության դեմ: