Ամերիկյան CBS հեռուստաընկերությանը տված հարցազրույցի ժամանակ Պենտագոնի ղեկավար Լեոն Պանետան անդրադարձել է Իրանի միջուկային ծրագրի խնդրին.
«Ինչպես պարզորոշ հասկացրել է նախագահ Բարաք Օբաման, ԱՄՆ-ը չի ցանկանում, որ Իրանը զբաղվի միջուկային զենքի մշակմամբ: Դա մեզ համար կարմիր գիծ է: Ակնհայտ է, որ նույնը պետք է ասել իսրայելցիների համար, որոնց հետ մենք ունենք ընդհանուր նպատակներ:
Եթե իրանցիներն առաջ շարժվեն միջուկային զենքի մշակման հարցում, և մենք ստանանք համապատասխան հետախուզական տվյալներ, ապա կիրականացնենք անհրաժեշտ քայլեր՝ նրանց կանգնեցնելու համար: Ընդ որում, չի կարելի բացառել գործողությունների որևէ տարբերակ:
Իրանի ղեկավարությունը դեռևս քաղաքական որոշում չի ընդունել միջուկային ռումբի արտադրությանը ձեռնամուխ լինելու մասին: Սակայն եթե դա տեղի ունենա, ապա հնարավոր է՝ Իրանը կարողանա միջուկային ռումբ ստեղծել 1 տարում, իսկ դրա փոխադրամիջոցի ստեղծումը կպահանջի ևս 1 կամ 2 տարի»: