Հայաստան-Թուրքիա հարաբերությունների կարգավորման համար անհրաժեշտ է ղարաբաղյան հակամարտության կարգավորումը, հայտարարել է Թուրքիայի արտգործնախարար Ահմեդ Դավութօղլուն։ Այս մասին տեղեկացնում է Тrend գործակալությունը` հղում կատարելով TRT-ին:
«Մենք ցանկանում ենք կարգավորել հարաբերությունները Հայաստանի հետ: Ցանկանում ենք, որ դրանք ամուր հարաբերություններ լինեն: Դրա համար անհրաժեշտ է սառեցված հակամարտությունների կարգավորում, ինչպիսին է ղարաբաղյան խնդիրը»,- նկատել է Դավութօղլուն:
Անդրադառնալով ապրիլին ԱՄՆ Կոնգրեսի Ներկայացուցիչների պալատում Հայոց ցեղասպանության մասին բանաձևի շուրջ հնարավոր քննարկումներին` Դավութօղլուն նկատել է. «Այդ հարցի էությունը չիմացող, պատմություն չիմացող Կոնգրեսի ներկայացուցիչները փորձում են ճնշում գործադրել Թուրքիայի վրա»:
Թուրքիայի ԱԳ նախարարի խոսքով, Թուրքիան չի ցանկանում, որպեսզի պատմական փաստերը օգտագործվեն Թուրքիայի դեմ որպես շանտաժի գործիք. «Այդ հարցը չպետք է Թուրքիայի և Միացյալ Նահանգների միջև դամոկլյան սուրի նման ճոճվի»: