«Բարգավաճ Հայաստան» կուսակցության Կապանի տարածքային խորհուրդը Ամանորի անակնկալ մատուցեց հարյուրավոր փոքրիկների։ Կապանի Ալ. Շիրվանզադեի անվան դրամատիկական թատոնի դահլիճը լեփ-լեցուն էր կուսակիցների երեխաներով։ Երեխաները դիտեցին «Հեքիաթային իրարանցում» ներկայացումը, որից հետո բոլորին Ձմեռ պապիկներն ու Ձյունանուշները բաժանեցին «Գագիկ Ծառուկյան» հիմնադրամի տրամադրած քաղցրավենիքի տոպրակները։ Ընդհանուր առմամբ բաժանվեց և դեռ պետք է բաժանվի 1000 տոպրակ։ Նվերներ հասան նաև մի քանի հասարակական կազմակերպությունների, «Արծվաբույն» տարեցների երեխաների խնամքի կենտրոններին ու 10 գյուղական համայնքների։ Իսկ ներկայացումից առաջ երեխաները բախտավորություն ունեցան լսելու ԲՀԿ-ի առաջնորդ Գագիկ Ծառուկյանի ուղերձը: Նկատենք, որ դահլիճում նստած փոքրիկների մեծ մասին այդպես էլ չհետաքրքրեց ԲՀԿ-ի առաջնորդի խոսքը: Երևի վիճակը շտկելու համար Ձմեռ պապը միջոցառման ավարտին հայտարարեց, որ «Այսքան լավ կյանքն ու տոպրակները մեր ԲՀԿ-ն ու Գագիկ Ծառուկյանն են մեզ տվել»:
Իսկ վերջում ԲՀԿ Կապանի տարածքային խորհրդի նախագահ Կամո Աբրահամյանն ասաց, որ միջոցառումը չի կուսակցականացվել. «Պարզապես Ձմեռ պապիկներից մեկը ԲՀԿ անդամ էր, և ուզեց կուսակցության գովազդը անել»:
