«Հայաստանը կարող է վերցնել հարևան երկրների և հատկապես Վրաստանի հաջող փորձն ու քայլ առ քայլ դրանք իրականացնելով՝ հաջողության հասնել»,-«Սիվիլիթաս» հիմնադրամի այսօրվա քննարկմանն այս մասին հայտարարեց Հանրապետական կուսակցության ներկայացուցիչ Արտակ Դավթյանը: Հարևան Վրաստանի փորձը, Արտակ Դավթյանի համոզմամբ, մեզ համար կարող է ուղեցույց լինել հատկապես տնտեսության բնագավառում: Պատգամավորը նկատեց, որ Վրաստանն իր քայլերով մի շարք ոլորտներում մեզ մեծապես գերազանցում է: Սակայն Վրաստանի փորձը ՀՀԿ ներկայացուցիչը խորհուրդ է տալիս կիրառել նայած թե որ տեսակետից. «Մենք չպետք է պատճենենք ու լրիվ նույն կերպ անենք այն, ինչ արել է Վրաստանը, հատկապես արտաքին քաղաքականության հետ կապված հարցերում, քանի որ վրացական քայլերն անդառնալի կորուստների հանգեցրին»,- նշեց Արտակ Դավթյանը` համոզված, որ այն, ինչ հաջողվել է Վրաստանին, կհաջողվի նաև Հայաստանին: