Ամեն օր Երևանի փողոցներում հայտնվում են տոնածառերի առևտրի նոր կետեր: Որքան մոտենում են տոները, այնքան ավելի շատ են սոճիները, որոնք արդեն դուրս են մղում եղևնիներին: Այս մասին ասվում է «Էկոլուր» հասարակական կազմակերպության տարածած հաղորդագրությունում: «Եղևնիների օտարերկրյա ծագումն աչքի է ընկնում: Ծառերը մեկը մյուսի նման են` գեղեցիկ, հավասար ճյուղերով: Իսկ սոճիներն անհամաչափ են, ճյուղերը` կտրտված: Շատ դեպքերում ծառը կիսով չափ է կտրված: Մենք կարծում ենք, որ եղևնիները բերված են: Դրանք ընտրել են, դարսել, աշխատել են պահպանել արտաքին տեսքը, որպեսզի արդարացվի բարձր գինը, որն ընդգրկում է ճանապարհածախսը և մաքսային վճարները: Սոճիների դեպքում այլ է: Նույնիսկ թարմ կտրվածքի վրա երևում է, որ այդ ծառերը հատվել են մոտակա անտառներից և անմիջապես վաճառքի են հանվել: Բոլորին ցանկանում ենք ուրախ անցկացնել տոները, այդ թվում՝ և վերահսկող մարմիններին, պետական տարբեր տեսչություններին: Դրա հետ մեկտեղ հիշեցնում ենք, որ տոնածառերի հատման արգելքը Հայաստանում ուժի մեջ է, իսկ եթե տեսչությունը չգիտի, թե ինչպես տարբերի տեղական սոճիները ներկրվածներից, ապա թող պարզապես ստուգի փաստաթղթերը»,- ասվում է այդ հաղորդագրությունում: