CNN Türk-ին տված հարցազրույցում Թուրքիայի արտգործնախարար Ահմեդ Դավութօղլուն հայտարարել է, որ «եկել է ժամանակը», որ քննարկվի ղարաբաղյան հակամարտության կարգավորմամբ զբաղվող ԵԱՀԿ Մինսկի խմբի կազմից Ֆրանսիայի դուրսբերման հարցը.
«Եթե գոյություն ունի երկու ազգ, որոնց մտահոգում է ղարաբաղյան հակամարտությունը, ապա դա թուրքերն ու ռուսներն են: Ֆրանսիայի նախագահ Նիկոլա Սարկոզին Հայաստանում գտնվել է 2 օր, մինչդեռ Ադրբեջանում՝ ընդամենը մի քանի ժամ: Նա բացահայտորեն ցույց տվեց իր կողմնակալությունը: Ես՝ որպես տվյալ ոլորտի մարդ, հայտարարում եմ, որ անհնար է դարձել Ֆրանսիայի կողմից այդ առաքելության շարունակումը:
Մենք քննարկելու ենք այդ հարցը: Ես անձամբ այդ մասին առաջարկ կուղղեմ ԵԱՀԿ Մինսկի խմբին: Եկել է դրա քննարկման ժամանակը: Կա՛մ Թուրքիան այդ սեղանի շուրջ բազմելու է որպես իրավահավասար անդամ, կա՛մ էլ Ֆրանսիան լքելու է ԵԱՀԿ Մինսկի խումբը: Այդպիսին է Թուրքիայի դիրքորոշումը»:
Հիշեցնենք, որ օրեր առաջ Մոսկվայում Թուրքիայի ու Ռուսաստանի արտգործնախարարները ստորագրել էին 30 կետից բաղկացած համատեղ հռչակագիր, որի 26-րդ կետը վերաբերում է ղարաբաղյան հակամարտության կարգավորմանը: Դրանում նշված էր, որ Թուրքիան ու Ռուսաստանը շահագրգռված են ղարաբաղյան հակամարտության շուտափույթ կարգավորմամբ, և որ ստատուս քվոյի պահպանումն անընդունելի է: