«Սիվիլիթասում» 2 կոալիցիոն և 2 ընդդիմադիր քաղաքական ներկայացուցիչներն ամփոփեցին 2010-ը: Բարձր գնաճ, ժողովրդագրական բացասական միտումներ, աղքատության խորացում. սրանք այն հիմնական խնդիրներն էին, որոնք չէին հերքում ո՛չ կոալիցիոն, ո՛չ ընդդիմադիր գործիչները`Լիլիթ Գալստյանը ՀՅԴ-ից, Արտակ Դավթյանը ՀՀԿ-ից, Ստեփան Սաֆարյանը «Ժառանգություն»-ից և Վարդան Բոստանջյանը ԲՀԿ-ից: «Այն բոլոր ծախսերը, որոնք մենք նախատեսել էինք բյուջեով, առաջին հերթին՝ սոցիալական ոլորտին վերաբերող ծախսերը, իրականացրել ենք»,-ամփոփելով ընթացիկ տարին՝ ասաց ՀՀԿ ներկայացուցիչ Արտակ Դավթյանը: ԲՀԿ ներկայացուցիչը բացասական համարեց այն հանգամանքը, որ 2 տարվա ընթացքում պետությունը ավելի քան կրկնապատկում է իր արտաքին պարտքը և հասցնում արդեն վտանգավոր շեմի: 2010-ը, Բոստանջյանի կարծիքով, աչքի ընկավ կառավարման ցածր որակով: Սակայն, թեև չակերտավոր, բայց հաջողություն, նրա կարծիքով, գրանցվեց 2010-ի ընթացքում, որը, ըստ ԲՀԿ ներկայացուցչի, իրարանցումներից ու ընդհարումներից խուսափելն էր:
ՀՀ տնտեսական համակարգում առկա վիճակը, Բոստանջյանի համոզմամբ, պայմանավորված է նաև արտաքին ազդակներով: «Կան խոշոր, որոշող երկրներ, իսկ մենք արտաքին աշխարհում գտնվում ենք սարսափելի կաշկանդված վիճակում»,- նշեց նա: Այնուամենայնիվ, 2010-ը ԲՀԿ ներկայացուցիչը նախորդ 2009-ից դրական է գնահատում և խնդրում է նկատի առնել, որ, բոլոր դեպքերում, 2010-ի ընթացքում ճգնաժամն այլևս մահանա չբերելու նախադրյալներ ստեղծվեցին:
ՀՅԴ ներկայացուցիչ Լիլիթ Գալստյանը ընթացիկ տարին գնահատեց ավելի քան բացասական. բարձր գնաճ, աղքատության բարձր ցուցանիշներ և հսկայական արտաքին պարտք, որը, նրա կարծիքով, ՀՀ յուրաքանչյուր քաղաքացու ուսերին է մնացել:
«Ժառանգության» ներկայացուցիչ Ստեփան Սաֆարյանին 2010-ի ընթացքում զարմացրել են հատկապես ՀՀ իշխանությունների՝ կանխատեսումներ անելու ապշեցուցիչ թուլությունը: «Իսկ 2010-ին մենք հնձեցիքն այն, ինչ ցանել էինք նախորդ տարիներին»,- նշեց նա: Իսկ ՀՀ տնտեսական համակարգում տիրող խաղի կանոնը, ըստ Սաֆարյանի, հենց կանոնների բացակայությունն է, քանի որ իշխանությունն այլևս անկարող է ղեկավարել իր իսկ զարգացրած օլիգարխիկ համակարգը: