«Առաջին լրատվականն» արդեն տեղեկացրել է, որ դեկտեմբերի 20-ին Մեծ Բրիտանիայի տարածքում ձերբակալվել էր 12 մարդ, որոնց մեղադրում էին այդ երկրի տարածքում ահաբեկչական գործողություններ նախապատրաստելու մեջ: Այն ժամանակ իրավապահները չէին հայտնել, թե կոնկրետ ինչ գործողություններ և որտեղ էին նրանք պատրաստվում իրականացնել: Միայն հայտնի էր, որ նրանց ձերբակալել են երկրի տարբեր քաղաքներում:
Այսօր The Daily Telegraph-ը, հայտնել է, որ ահաբեկիչների հնարավոր թիրախներից են եղել աշխարհահռչակ Բիգ Բեն աշտարակը, Վեստմիստերյան աբբայությունը, ինչպես նաև Սայենտոլոգների եկեղեցիներից մեկը:
Բացի այդ, իրավապահները հայտնել են, որ հայտնաբերվել են Եմենում հրատարակված «Ալ-Ղաիդայի» ամսագրեր, ինչպես նաև մի թուղթ, որում, որպես օբյեկտներ, հասցեներով նշված էին Լոնդոնի բորսան, քաղաքապետարանը և ամերիկյան դեսպանատունը: