«Ժառանգություն» կուսակցության պատգամավոր Արմեն Մարտիրոսյանը հաստատեց մամուլում շրջանառվող այն լուրերը, որ «Ազատ դեմոկրատներ»-ի հետ քննարկում են առաջիկա խորհրդարանական ընտրություններում դաշինքով հանդես գալու հարցը: Այս մասին Արմեն Մարտիրոսյանն ասաց «Առաջին լրատվական»-ի հետ զրույցում: Սակայն նա հերքեց այն լուրերը, ըստ որոնց՝ դաշինքի շուրջ «Ազատ դմեկտրատներ»-ի հետ ընթացող քննարկումներում կարևորագույն հարցը 2013 թ. նախագահական ընտրություններում Րաֆֆի Հովհաննիսյանի թեկնածությունը պաշտպանելու խնդիրն է:
«Հնարավոր դաշինքի շուրջ քննարկումներ, այո, կան, բայց պաշտոնական բանակցություններ՝ դեռևս ոչ: Քննարկում ենք տարբեր հարցերի վերաբերյալ երկու կողմերի տեսակետները, խնդիրների լայն դիապազոն է վերցված, մինչև դաշինքի կազմումը շատ հարցեր կան»,- ասաց Մարտիրոսյանը:
Հարցին՝ ճի՞շտ են լուրերը, որ «Ազատ դեմոկրատները» ցանկանում են առավելագույն տեղեր ստանալ դաշինքի համամասնական ցուցակի առաջին տասնյակում (մասնավորապես, երկու տեղ` առաջին և երեք տեղ` երկրորդ հնգյակում) Արմեն Մարտիրոսյանը պատասխանեց. «Ճիշտն ասած՝ նման քննարկում ընդհանրապես չի եղել, որ ես հերքեմ կամ հաստատեմ դա: Պետք է բանակցություններ սկսվեն, որ տեղերի, նախագահական ընտրություններում Րաֆֆի Հովհաննիսյանին սատարել-չստարելու մասին խոսակցություններ լինեն»:
Նշենք, որ «Հայկական ժամանակ» թերթը գրում է, թե լավատեղյակ աղբյուրներից հայտնի է դարձել, որ «Ժառանգություն»-«Ազատ դեմոկրատներ» կուսակցությունները քննարկում են համատեղ դաշինքով հանդես գալու հարցը, իսկ բանակցություններում քննարկվող կարևորագույն խնդիրը, ըստ օրաթերթ, վերաբերվում է 2013 թ. նախագահական ընտրություններին: «Մեր աղբյուրները պնդում են, ահա, որ «Ժառանգությունը» պատրաստ է առաջիկա խորհրդարանական ընտրություններում «Ազատ դեմոկրատների» հետ նախընտրական դաշինք կազմել, եթե վերջիններս պարտավորվեն 2013 թ. նախագահական ընտրություններում պաշտպանել Րաֆֆի Հովհաննիսյանի թեկնածությունը: Մեր աղբյուրների հաղորդմամբ՝ «Ազատ դեմոկրատները» պատրաստ են ընդունել այդ պայմանը, որովհետև համարում են, որ նախագահական ընտրություններում արժանի սեփական թեկնածու չունեն: Նման աջակցության դեպքում, սակայն, «Ազատ դեմոկրատները» ցանկանում են առավելագույն տեղեր ստանալ համատեղ համամասնական ցուցակի առաջին հնգյակում և առաջին տասնյակում: Երկու տեղ` առաջին և երեք տեղ` երկրորդ հնգյակում: Բացի այդ, եթե առաջիկա ընտրություններում Աժ չեն անցնում, նախագահական ընտրություններում Րաֆֆիին սատարելու պայմանը ջրվում է»,- գրում է «Հայկական ժամանակ»-ը:
