Ռուսաստանի Դաշնության նախագահ Դմիտրի Մեդվեդևը հեռուստաընկերություններին տված հարցազրույցում, ըստ ռուսաստանյան փորձագիտական շրջանակների, փաստացի «վճիռ է կայացրել» «արտահամակարգային» ընդդիմության վերաբերյալ: Նա հասկացրել է, որ ո՛չ Կասյանովը, ո՛չ Նեմցովը, ոևչ Լիմոնովը, ո՛չ էլ Կասպարովը, անգամ իրենց ընտրազանգվածին հենվելով, որևէ հնարավորություն չունեն պետական պաշտոններ զբաղեցնելու: Մեդվեդևը շեշտել է, որ Ռուսաստանի քաղաքական հիմնական ռեսուրսը «առայժմ ոչ այնքան հայտնի տաղանդավոր մարդիկ են»,- գրել է Независимая газета-ն:
Հեռուստաընկերություններին տված հարցազրույցում ՌԴ նախագահը նշել էր. «Ցանկանում եմ պաշտոնապես հայտարարել` նման քաղաքական գործիչներ մեր երկրում կան»,- առանց հեգնանքը թաքցնելու, ասել է ՌԴ նախագահը՝ հավելելով, որ նրանցից շատերի անունները հայտնի են: Ապա ՌԴ նախագահը սկսել է անուններ տալ, այդ թվում և՝ հայտնի ընդդիմադիրներինը. «Այդպիսի հայտնի քաղաքական գործիչները, ինչպիսիք են պարոն Կասյանովը, Նեմցովը, Լիմոնովը, Կասպարովը, նույնպես հասարակական գործիչներ են: Նրանց տարբեր կերպ են վերաբերվում, նրանից յուրաքանչյուրը, այսպես կոչված, իր ընտրական բազան ունի»,- հեգնանքով նշել է Մեդվեդևը, ապա հավելել. «Ամենակարևոր ռեսուրսը այն է, որի մասին մենք չենք խոսում: Դա տաղանդավոր մարդկանց ռեսուրսն է: Այնտեղ էլ մեր պետության ապագան է, և այնտեղ էլ ապագա նախագահներն են, վարչապետները, դեպուտատները»:
