«2011-ը մենք կկոչենք առաջին կայուն զարգացման տարին ճգնաժամից հետո»,- լրագրողների հետ հանդիպման ժամանակ այսօր հայտարարեց ԱԺ ֆինանսավարկային և բյուջետային հանձնաժողովի նախագահ Գագիկ Մինասյանը: Ըստ նրա՝ ինչպես այս տարի, այնպես էլ հաջորդ տարի լուրջ ուշադրություն կդարձվի արդյունաբերության ոլորտին: «Վճռական ենք արդյունաբերությունը տնտեսության զարգացման շարժիչ ուժ դարձնելու հարցում։ Մենք վճռական ենք նաև այն հարցում, որ տնտեսությունը պետք է դառնա ավելի դիվերսիֆիկացված»,- ասաց Մինասյանը։ Անդրադառնալով ձվի հետ կապված վերջին իրադարձություններին` նա նշեց, թե չի կարծում, որ ձուն արտադրվում է, սակայն շուկա չի հանվում: «Հեռու եմ նաև այն մտքից, որ ձվի գների բարձրացումը պայմանավորված է ձվարտադրողներ համաձայնեցված քայլերով։ Խոսակցությունները, թե հանրապետություն ձու է ներկրվել, նշանակում է, որ դրա պահանջարկը կա։ Ավելի ստույգ՝ կա մեծ պահանջարկի և փոքր առաջարկի խնդիր»,- ասաց Մինասյանը։
Լուսանկարը՝ PanarmenianPhoto-ի