Բուլղարական ոստիկանությունը ձերբակալել էր մի տղամարդու, որը սպանել էր որդուն: Տղան ջղայնացրել էր հորը նրանով, որ հանրահայտ Skype ծրագրով օն-լայն ռեժիմով շփվել էր ընկերների հետ:
Ինչպես հայտնում է SNews.bg՝ հղում անելով ոստիկանական հայտարարությանը, մանկասպանության համար ձերբակալվել է Վրաց քաղաքի 46-ամյա բնակիչը: Որդուն նա սպանել է այն ժամանակ, երբ կինը գտնվում էր գործուղման մեջ:
Սկսված հետաքննության տվյալներով, դեկտեմբերի 24-ին կեսգիշերից քիչ առաջ 21-ամյա երիտասարդը Skype ծրագրով շփվում էր ընկերների հետ, իսկ նույն ժամանակ նրա հարբած հայրը փորձում էր քնել: Որոշ ժամանակ անց վեճ է ծագում, քանի որ հայրը չէր կարողանում քնել:
Հայրը վերցնում է պտուտակահանը և երեք անգամ հարվածում որդու գլխին: Ստացված վերքերն անհամատեղելի էին կյանքի հետ, և տղան հիվանդանոցի ճանապարհին մահանում է:
Ձերբակալելուց հետո տղամարդը ընդունել է իր մեղքը և իբրև սպանության պատճառ է հայտնել այն հանգամանքը, որ որդին ժամերով նստում էր համակարգչի դիմաց և խոսում ընկերների հետ:
Հայտնում են նաև, որ վերջին ժամանակներում հայր ու որդի մենակ են ապրել. մեղադրյալի կինը գնչուհի է և ապրում է արտասահմանում:
Եթե բժշկական փորձաքննություն ապացուցի, որ հանցագործության ժամանակ տղամարդը խմած է եղել, ապա դա կլինի ևս մեկ ծանրացուցիչ հանգամանք: