Այսօր ՀՀ նախագահական նստավայրի դիմացի մայթին տեղի ունեցավ բողոքի ցույց` օտարալեզու դպրոցների դեմ շարժմանը միացած հասարակական կազմակերպությունների և անհատների մասնակցությամբ: Նրանք` «Հանրապետականը` Հայոց լեզվի թշնամի», «Գաղութացմանը` ոչ», «Լեզվի մասին օրենքը անձեռնմխելի է» պաստառներով նախագահ Սերժ Սարգսյանից պահանջում էին չստորագրել «Լեզվի մասին» և «Հանրակրթության մասին» օրենքներում փոփոխություններ կատարելու մասին ՀՀ օրենքի նախագիծը, որն Ազգային ժողովն ընդունել է սույն թվականի դեկտեմբերի 22-ին: «Նախագահը միանշանակ կստորագրի, որովհետև չստորագրելու համար անհրաժեշտ է այդ ամենը ընկալել, այդ ամենը իր մեջ ներառել և վերջապես լինել հայ, և գալու է ժամանակ, որ այս օրենքը ստորագրողը Սահմանադրության առաջ պատասխան է տալու»,- նշում է ցույցի մասնակից, իրավաբան Հարություն Բաղդասարյանը:
«Սարդարապատ» շարժման անդամ, կինոռեժիսոր Տիգրան Խզմալյանը ցույցին մասնակցում է ցույց տալու համար, որ իրենք կան, որ իրենք ոչինչ չեն մոռանա և ոչինչ չեն ների. «Երկրում ձևավորվել է և թափ է առնում հարուստների և աղքատների բևեռացում և սա շատ վտանգավոր բևեռացում է, որը հղի է մահացու վտանգով պետության և պետականության համար: Սա հանցագործություն է նախ երեխաների դեմ, մեր ապագայի դեմ և երկրի դեմ»:
Ցույցի մասնակիցները, որոնց թվում էին նաև բազմաթիվ անվանի մտավորականներ, նախօրոք հարյուրավոր մարդկանց կողմից ստորագրված պահանջագիրը կհանձնեն վաղն
առավոտյան. «Մեզ ասացին, որ հիմա փակ է, և նստավայրում մարդ չկա», նշեցին
կազմակերպիչները:
