«Ինչպես արդեն տեղեկացրել ենք, թեժ քաղաքական պայքար է սպասվում Արմավիր քաղաքն ու հարակից գյուղական համայնքներն ընդգրկող թիվ 21 ընտրատարածքում, որտեղ պատգամավորի թեկնածու են առաջադրվելու պատգամավորներ ՝ ՀՀԿ-ական Նահապետ Գևորգյանը և ԲՀԿ-ական Ռուստամ Գասպարյանը»,- գրում է «Հրապարակ»-ը և հավելում.
«Վերջինս երեկ թերթերից մեկում խոսելով այն մասին, որ առաջիկա խորհրդարանական ընտրություններում ՀՀԿ նախագահ Սերժ Սարգսյանը կարող է պաշտպանել իր կուսակից Նահապետ Գևորգյանին, ասել էր, որ ինքը նախագահի ավելի մոտ ընկերն է, ինքը և նախագահը մարտական ընկերներ են, ավելացնելով, որ մարտական ընկերները չեն դավաճանում»:
Խոսելով այս թեմայի մասին, Աժ պատգամավոր Նահապետ Գևորգյանն ասել է. «Կարծում եմ, որ երկրի բարձրաստիճան պաշտոնյաների մասին նման հայտարարություններ անելը շատ ամոթ է, մանավանդ, որ դա չի համապատասխանում իրականությանը: Իսկ ինչ վերաբերում է նրան, որ ինքը նախագահի ընկերն է, առավել ևս մարտական ընկերը, ապա նման բաներ խոսելուց առաջ թող հիշի իր անցյալը և անցյալում կատարած քայլերը»:
Ռուստամ Գասպարյանը կարծիք էր հայտնել, որ ընտրություններում ինքը հաղթելու է: Ի պատասխան Գասպարյանի այս հայտարարությանը, Գևորգյանն ասել է.«Ջուրը չտեսած` պետք չէ բոբիկանալ»: