Ըստ ֆինանսների նախարարության այսօր հրապարակած տվյալների` 2010 թ. հունվար-նոյեմբեր ամիսներին ընթացիկ ծախսերը կազմել են 662.1 մլրդ դրամ` նախորդ տարվա նույն ժամանակահատվածի համեմատ աճելով 6.1%-ով կամ 38.1 մլրդ դրամով: Ընթացիկ ծախսերից 62.5 մլրդ դրամ տրամադրվել է պետական հիմնարկների աշխատողների աշխատավարձերի վճարմանը, 4.5 մլրդ դրամ` պարտադիր սոցիալական ապահովության վճարներին, որոնք կազմել են տարեկան ծրագրի համապատասխանաբար 83.4%-ը և 81.3%-ը: Նախորդ տարվա նույն ժամանակահատվածի համեմատ, նշված ծախսերն աճել են համապատասխանաբար 4.8%-ով և 3.6%-ով: Ծառայությունների և ապրանքների ձեռքբերման նպատակով պետական բյուջեից օգտագործվել է 137.6 մլրդ դրամ, որի տարեկան ծրագիրը կատարվել է 84.4%-ով, իսկ փաստացի ցուցանիշը 6%-ով գերազանցել է նախորդ տարվա նույն ցուցանիշը: Հաշվետու ժամանակահատվածում 25.2 մլրդ դրամ հատկացվել է պետական պարտքի սպասարկմանը` կազմելով տարեկան ծրագրի 74.1%-ը: Մասնավորապես` նշված գումարից 15.3 մլրդ դրամը տրամադրվել է ներքին, 9.9 մլրդ դրամը` արտաքին պարտքի սպասարկմանը: 2009 թվականի նույն ժամանակահատվածի համեմատ, պետական պարտքի սպասարկման ծախսերն աճել են 108.2%-ով կամ 13.1 մլրդ դրամով, ընդ որում, աճ է արձանագրվել ինչպես ներքին, այնպես էլ արտաքին պետական պարտքի սպասարկման ծախսերի գծով: