«Լրագրողներ առանց սահմանների» միջազգային կազմակերպության զեկույցը, ուր նշվում է հայաստանյան մամուլի՝ 2010 թվականի համեմատ 2011-ին զգալի թռիչք արձանագրելու մասին, մեծ գոհունակություն է պատճառում «Ազգ» օրաթերթի խմբագիր Հակոբ Ավետիքյանին: Այս մասին նա ասաց «Առաջին լրատվական»-ի հետ զրույցում:
«Դրական տեղաշարժը ոգևորում է՝ հատկապես համեմատած մեր հարևանների հետ: Այն, որ Կովկասում Հայաստանն առաջատար է, արդեն իսկ շատ լավ ցուցանիշ է: Բայց չմոռանանք մի բան. նման միջազգային կազմակերպությունները սևեռուն ուշադրություն դարձնում են երևույթների բացասական կողմերին: Այս պարագայում, իրոք, Հայաստանում 2011 թվականին մամուլի և լրագրողների հանդեպ բռնաճնշումները նվազագույնի են հասել, ինչն էլ զեկույցում արձանագրվել է որպես դրական երևույթ»,- ասաց Հակոբ Ավետիքյանը:
Դիտարկմանը, որ զեկույցն արձանագրում է, որ Հայաստանի ԶԼՄ-ները շարունակում են մնալ դատական հետապնդումների ճնշման տակ, իսկ օրենքով պահանջվող փոխհատուցման չափերը մտահոգիչ են՝ «Ազգ»-ի խմբագիրը պատասխանեց. «Լրատվամիջոցների դեմ դատական գործեր կան յուրաքանչյուր երկրում: Հարաբերությունները դատարանում պարզաբանել փորձելը հաստատ ավելի քաղաքակիրթ է: Այլ բան են մամուլի հանդեպ կիրառվող անհամաչափ տուգանքները, որոնց շուրջ համաձայնության գալը դատարաններում երևի թե ավելի հեշտ է»:
Ըստ Հակոբ Ավետիքյանի՝ «Լրագրողներ առանց սահմանների» միջազգային կազմակերպության զեկույցը բացասական միտումների նվազման գնահատականն է: «Իսկ ահա պրոֆեսիոնալիզմի առումով դեռ ոչնչի չենք հասել, եթե, իհարկե ոչ՝ նահանջել ենք»,- ասաց նա:
Նշենք, որ ըստ «Լրագրողներ առանց սահմանների» միջազգային կազմակերպության` 2010թ. համեմատ Հայաստանը զգալի թռիչք է արձանագրել` 101-րդ տեղից հասնելով 77-րդ տեղ: Մամուլի ազատությանը վերաբերող զեկույցը, այդուհանդերձ, արձանագրում է նաև հետևյալը. «Հայաստանի դիրքերի 24 հորիզոնականով բարելավումը թվում է, թե նշանակալի առաջընթաց է, սակայն Հայաստանը փաստացի վերադարձել է այնտեղ, որտեղ գտնվում էր 2008թ. վիճելի ընտրություններից առաջ: ԶԼՄ-երը շարունակում են մնալ դատական հետապնդումների ճնշման տակ, օրենքով պահանջվող փոխհատուցման չափերը մտահոգիչ են»: Ըստ «Լրագրողներ առանց սահմանների» կազմակերպության` հայկական ԶԼՄ-երում վիճակը կայունացել է 2008-ից հետո, սակայն դատական գործերն ու հետապնդումները շարունակում են միջամտության էական գործոն հանդիսանալ անկախ լրատվամիջոցների դեպքում: