Այսօր Կենտոն և Նորք Մարաշ համայնքների ընդհանուր իրավասության դատարանը` դատավոր Մնացական Մարտիրոսյանի նախագահությամբ, երկու տարի պայմանական ազատազրկման է դատապարտել Հայ ազգային կոնգրեսի ակտիվստներ Սարգիս Գևորգյանին և Դավիթ Քիրամիջյանին: Իշխանությունները երիտասարդներին մեղադրում են, իբրև թե այս տարվա մայիսի 31-ին Ազատության հրապարակ մուտք գործելու ժամանակ խուլիգանություն են արել և նաև «հետևից» պարբերաբար բռնություն են կիրառել ոստիկանի նկատմամբ: «Առաջին լրատվական»-ի հետ զրույցում Դավիթ Քիրամիջյանը, մեկնաբանելով դատավորի որոշումը, կարծիք հայտնեց, որ, ընդհանրապես, դատավորը կարող էր ամբողջությամբ բավարարել դատախազի պահանջը և իրենց դատապարտել երեք տարի ազատազրկման: «Բայց նա փորձեց մի քիչ «մեղմոտ» լինել՝ և՛ մի տարով պակասացնել, և՛ պայմանական տալ: Իսկ, ընդհանրապես, այդ որոշումն ինձ համար անակնկալ չէր, սպասում էի, որ դատավորը մի չհիմնավորված որոշում պետք է կայացնի»,- ասաց Քիրամիջյանը: Երիտասարդ ակտիվիստ Սարգիս Գևորգյանն էլ հավելեց. «Էլ ի՞նչ ասեմ մի պետության իրավապահ համակարգի մասին, որտեղ և՛ ոչ մի հանցանք չգործած մարդը, և՛ «Պապլավոկում» մարդ սպանած թիկնապահը կարող են նույն պատժաչափին արժանանալ»: Նույն գործով որպես վկա անցնող՝ Կոնգրեսի արտաքին կապերի պատասխանատու Վլադիմիր Կարապետյանն էլ նշեց, որ գործն ամբողջությամբ փլվեց դատարանում, և դրա համար պաշտպան կողմի մեծ վարպետություն պետք չէր, քանի որ կային բազմաթիվ տեսագրություններ, որոնց համաձայն, հենց ոստիկանության ապօրինի գործողությունների արդյունքում, երբ արգելվում էր մի քանի անձանց, այդ թվում՝ իմ մուտքը Ազատության հրապարակ, առաջացավ քաշքշոց, և ոստիկանների բռնության զոհ դարձան բազմաթիվ քաղաքացիներ, այդ թվում` Գևորգյանն ու Քիրամիջյանը: «Փորձելով քողարկել ոստիկանության հերթական ապօրինությունը` շինծու գործ հարուցվեց 18-ամյա երիտասարդների դեմ: Հատկանշական է նաև, որ վճիռը կարդացվեց արդարադատության նոր նախարարի նշանակումից հետո, ինչը ուղերձ է հասարակությանը, որ արդարություն հասնելու գործում որևէ փոփոխություն չի լինելու: Կարծում եմ` այս գործը առաջին հերթին պետք է Հրայր Թովմասյանին հետաքրքրեր, և կցանկանայի լսել նրա կարծիքն այս աղաղակող ապօրինության և մսագործ դատավորի արձակած վճռի վերաբերյալ»,- ասաց Կարապետյանը: