ԱՄՆ-ի Ֆլորիդա նահանգը` ամենաանհավանական լուրերի աղբյուր

Agence France-Presse գործակալությունը, վերլուծության ենթարկելով 2010 թ. տեղի ունեցած տարօրինակ երևույթների և իրադարձությունների մասին լուրերը, եկել է այն եզրակացության, որ Ամերիկայի Ֆլորիդա նահանգը ԱՄՆ-ում հայտնի է իր ամենատարօրինակ լուրերով:
Պարզվել է, որ հենց Ֆլորիդայում են տեղի ունեցել ամենամեծ քանակությամբ ծիծաղելի և տարօրինակ պատմությունները, այդ թվում` հիմար հանցագործությունները, կենդանիների մասնակցությամբ զվարճալի իրադարձությունները, անսովոր զանգերը փրկարար ծառայությանը և այլն, որոնք հայտնվել են տեղեկան և արտասահմանյան ԶԼՄ-ներում:
Այս իրադարձությունների թվում են արկղի միջից կատուների դուրս բերման օպերացիան, շան վրա հարձակված կոկորդիլոսի սպանությունը, մի տղամարդու զանգը փրկարար ծառայություն, որը բողոք էր ներկայացրել, թե մայրն իր ձեռքից վերցրել է գարեջուրը, ինչպես նաև հանկարծակի մահացած կնոջ աճյունի վաճառքը:
Բացի այդ, գործակալությունը հիշել է այն լուրը, թե ինչպես մի տղամարդու հետույքում հայտնաբերել էին մարիխուաննա և այլ թմրանյութ, սակայն այդ մարդը հայտարարել էր, որ դրանք իրենը չեն, և ինքը չգիտի, թե որտեղից են հայտնվել իր մոտ: Ֆլորիդայում է գրանցվել նաև շան պատճառով տեղի ունեցած ճանապարհային պատահարը, երբ շունը սեղմել էր արագացման սեղմակն ու մեքենայի տակ գցել տիրոջը: