ՆԱՏՕ-ի գլխավոր քարտուղար Անդերս Ֆոգ Ռասմուսենը հայտարարել է, որ ՆԱՏՕ-ն մտադիր չէ ռազմական նոր գործողություններ ծավալել Լիբիայում: Այս մասին հայտնում է РИА Новости-ն:
«Մենք ավարտել ենք մեր գործողությունները Լիբիայում անցած տարվա հոկտեմբերի 31-ին, և մտադիր չենք վերադառնալ»,- ասել է նա Բրյուսելում` պատասխանելով այն հարցին, թե ինչպես է վերաբերվում Լիբիայի Բանի Վալիդ քաղաքում տեղի ունեցած իրադարձություններին, որտեղ այս երկուշաբթի տեղ էին ունեցել զանգվածային հուզումներ:
Ռասմուսենը հիշեցրել է, որ ՆԱՏՕ-ն Լիբիայում արդեն իսկ իրականացրել է «Միացյալ պաշտպան» գործողությունը` ՄԱԿ-ի ԱԽ մանդատի համապատասխան:
Բանի Վալիդում հուզումների մասին առաջին հաղորդագրությունները հայտնվել էին այս երկուշաբթի: Քաղաքային իշխանությունները հայտարարել էին, որ Բանի Վալիդ էին մտել Քադաֆիի զինված կողմնակիցները, որոնք իրենց վերահսկողության տակ էին վերցրել քաղաքի կարևոր շրջանները: Սակայն ՆԳ նախարարությունում այս տեղեկությունը հերքել են: