Հունվարի 27-ին ՀՀ արտակարգ իրավիճակների նախարարության և «Հարավկովկասյան երկաթուղի» ՓԲԸ-ի մասնագետները համատեղ ուժերով կազմակերպելու են Երևան-Գյումրի հատվածի երկաթուղային ենթակառուցվածքի զննում:
Հայաստանի արտակարգ իրավիճակների նախարարության փրկարար ծառայությունից «Առաջին լրատվական»-ին տեղեկացնում են, որ ՀԿԵ ՓԲԸ-ի կողմից զննմանը մասնակցելու են ղեկավար կազմի ներկայացուցիչները` ընկերության գլխավոր տնօրենի պաշտոնակատար Մարատ Խակովի գլխավորությամբ:
Երևան-Գյումրի հատվածի երկաթուղային ենթակառուցվածքի զննումը կազմակերպվում է երկաթուղուն սպառնացող ռիսկերը բացահայտելու և դրանք նվազեցնելու համար արդյունավետ միջոցառումներ կազմակերպելու նպատակով։
2011թ. դեկտեմբերի 6-ին ՀՀ արտակարգ իրավիճակների նախարար Արմեն Երիցյանը և ՀԿԵ ՓԲԸ գլխավոր տնօրեն Շևքեթ Շայդուլինը ստորագրել են Համագործակցության մասին հուշագիր։
Համաձայն հուշագրի՝ արտակարգ իրավիճակների նախարարությունը և «Հարավկովկասյան երկաթուղի» ՓԲԸ–ն համագործակցելու են հետևյալ ոլորտներում`
1. տեխնածին վթարների, տարերային աղետների կանխարգելում, դրանց հնարավոր հետևանքների նվազեցում և վերացում
2. տեխնածին վթարների և տարերային աղետների կանխատեսում, մոնիտորինգ և վաղ ազդարարում
3. բնակչության իրազեկում և պատրաստվածության բարձրացում
4. քաղաքացիական պաշտպանության ոլորտում համատեղ գործունեություն
5. արագ արձագանքման, վթարավերականգնողական, որոնողափրկարարական, տարհանման և այլ աշխատանքների համատեղ կազմակերպում
6. կադրերի պատրաստում և վերապատրաստում, ուսումնական բազաների ձևավորում։
