«Առաջին լրատվականը» հաղորդել էր, որ Երևանի նախկին քաղաքապետ Գագիկ Բեգլարյանի պաշտոնանկությունից հետո սպասվում է ՀՀ նախագահի աշխատակազմի ղեկավար Կարեն Կարապետյանի պաշտոնանկությունը։ Ըստ մեր աղբյուրի` Կարեն Կարապետյանը, իմանալով, որ իր աշխատակիցը` Արամ Կանդայանը, ծեծի է ենթարկվել Գագիկ Բեգլարյանի կողմից, ու ինքը չի կարողացել որևէ կերպ կանգնեցնել Բեգլարյանին, իր մեղքի գիտակցմամբ, հրաժարականի դիմում էր գրել Սերժ Սարգսյանին։ Նույն գիշեր Կարապետյանի հանրապետական գործընկերները ակտիվորեն զբաղված էին լրատվամիջոցների հետ աշխատանքով, որպեսզի հնարավորինս քիչ կամ ընդհանրապես չգրվի որևէ տեղեկություն Կարեն Կարապետյանի մասին։ Մի քանի օր չանցած` Կարեն Կարապետյանը մամուլի միջոցներից մեկին բավական ինքնավստահ հարցազրույց տվեց, որտեղ կտրականապես հերքեց իր հրաժարականի մասին լուրը։ Նախագահանին մոտ կանգնած աղբյուրները միայն հիմա են բացահայտում, որ Բեգլարյանի հրաժարականին հաջորդող երկու օրերին Կարեն Կարապետյանի աշխատանքի մնալ-չմնալու հարցը լուծվել է Մոսկվայում։ Նախագահականի կողմից Կարեն Կարապետյանի մասին լուրերն էլ հերքվել են միայն այն բանից հետո, երբ ակնհայտ է դարձել, որ Մոսկվան որոշել է Կարեն Կարապետյանին «պահել» զբաղեցրած աթոռին։
Այլ աղբյուրների հաղորդմամբ, հրաժարական տալ-չտալու այս պատմությունից հետո նորից շրջանառության մեջ է դրվել Կարեն Կարապետյանի` Հայաստանի վարչապետ նշանակվելու հարցը: Քանի որ ռուսներին շարունակում է նյարդայնացնել Տիգրան Սարգսյանի արևմտյան կերպարը, իսկ ՌԴ վարչապետ Վլադիմիր Պուտինի բացահայտ դժգոհությունից հետո նյարդայնությունը կրկնապատկվել է, շատ հավանական է, որ Հայաստանի վարչապետի աթոռն առաջիկայում «ազատվի», և այդ պաշտոնն առաջարկվի Կարեն Կարապետյանին, քանի որ վերջինս չափազանց վստահելի է ռուսների համար: