Վրաստանը «պետք է դառնա այս տարածաշրջանի Սինգապուրը», դրան նպաստում է ազատական հարկային քաղաքականությունը,- հայտարարել է Վրաստանի նախագահ Միխեիլ Սաակաշվիլին վրացի և օտարերկրացի ներդրողների հետ հանդիպման ժամանակ։ Վրաստանի նախագահը մասնակցել է բարեգործական ճաշկերույթի, որտեղ էլ հանդես է եկել ելույթով:
Վրաստանի նախագահը նշել է, որ ընթացիկ տարում Վրաստանում տնտեսական աճը կազմել է ավելի քան 6 տոկոս, ինչը լավ ցուցանիշ է՝ հաշվի առնելով աշխարհի տնտեսական և ֆինանսական վիճակը։ Վրաստանի նախագահը ընդգծել է, որ բիզնես ձեռնարկելու հեշտությամբ Վրաստանն աշխարհում զբաղեցնում է 12-րդ տեղը, իսկ կաշառակերությունը երկրում գրեթե զրոյական է, և այս տարի առաջին անգամ հաջողվել է կրճատել գործազրկության մակարդակը։
«2010 թվականը, չնայած լուրջ վայրիվերումներին, կարևոր տարի էր մեր տնտեսության համար: Ոչ միայն անկումը վերացավ, այլև արձանագրվեց 6 տոկոս աճ: Աճը մեծ է` հաշվի առնելով աշխարհում առկա միտումները»:
Խոսելով Վրաստանի ապագայի մասին՝ Սաակաշվիլին նշել է, որ Վրաստանը պետք է դառնա այս տարածաշրջանի Սինգապուրը. «Մենք իդեալականորեն նախապատրաստված ենք Վրաստանում կատարվելիք ներդրումներին, և դա կարևոր բաղադրիչ է, որպեսզի Վրաստանը դառնա այնպիսին, ինչպիսին մենք ձգտում ենք տեսնել՝ այս տարածաշրջանի Սինգապուր»,- հաղորդում է Trend-ը։
