Ինչպես հայտնում է ռուսական Независимая газета թերթը, երեկ ՌԴ նախագահ Դմիտրի Մեդվեդևը ստորագրել է «Սև ծովի շուրջ ավտոմայրուղու կառուցման համակարգման մասին հուշագրի վավերացման մասին» օրենքը: Այս մայրուղին կունենա 7 հազար կմ երկարություն և իրար կմիացնի մերձսևծովյան երկրները, ինչն էլ կխթանի տնտեսական և զբոսաշրջային կապերը: Այս շինարարության բյուջեն դեռ սահմանված չէ, սակայն փորձագետները կարծում են, որ ծրագիրը կիրագործվի, և հնարավոր կլինի շրջանցել Վրաստանի վերապահումները: Այս հուշագիրը ստորագրվել է 2007 թ. ապրիլին Բելգարդում Սևծովյան համագործակցության խորհրդի անդամ երկրների կողմից: Այս փաստաթղթի ստորագրման համար պատճառ են հանդիսացել այն բազմաթիվ դժվարությունները, որոնք առաջանում են միջազգային ավտոմոբիլային փոխադրումների ժամանակ: Հուշագրով նախատեսվում է միմյանց կապել Ստամբուլը, Սամսունը, Տրապիզոնը (Թուրքիա), Բաթումը, Փոթին (Վրաստան), Նովոռոսիյսկը, Դոնի Ռոստովը, Տագանրոգը (Ռուսասան), Մարիուպոլը, Մելիտոպոլը, Օդեսան (Ուկրաինա), Քիշնևը (Մոլդովա), Բուխարեստը (Ռումինիա), Խասկովոն (Բուլղարիա), Կոմոտինին, Ալեքսանդրուպոլուսը (Հունաստան), Էդիրնեն (Թուրքիա):
Քաղաքական գործոններից, որ կարող են խոչընդոտել ծրագրի իրագործմանը, Վրաստանի դիրքորոշումն է: Ինչպես թերթին ասել է վրացական անկախ փորձագետ Գեորգի Խուխաշվիլին, շատ ցանկալի է, որպեսզի այս ծրագիրն իրականանա: Սակայն գոյություն ունեն բազմաթիվ քաղաքական չլուծված խնդիրներ, որոնք կանվնած են դրա իրագործման ճանապարհին: Նա հույս է հայտնել, որ Վրաստանն ու Ռուսաստանն այս հարցի շուրջ կհամագործակցեն, թեպետ այդպիսի գործողությունների համար դեռ նախադրյալներ չկան:
Որոշ փորձագետներ կարծում են, որ այստեղ կարող է դեր խաղալ նաև Կարսի պայմանագիրը, քանի որ ճանապարհն անցնելու է նաև Աջարիայի տարածքով, իսկ քանի որ Թուրքիան և Ռուսաստանը համարվում են այդ տարածքի անվտանգության երաշխավոր, ապա հայտնի չէ, թե այս հարցն ինչպես է կարգավորվելու:
Ինչպես թերթի հետ զրույցում ասել է մեկ այլ փորձագետ՝ ինժեներ Անդրեյ Սմիրնովը, «իհարկե, շղթան, որը կկառուցվի ծովի շուրջ, շատ կարևոր է, սակայն այն կունենա նաև ճյուղավորումներ: Դրանցից մեկը կլինի «Ախալցխա-Գյումրի-Երևան-Հրազդան-Թբիլիսի»-ն: Դա թույլ կտա հետագայում Հայաստանը կապել Ադրբեջանի և Թուրքիան՝ Վրաստանի հետ: Այս պահին սա լավագույն միջոցն է՝ հանելու Հայաստանը մեկուսացումից»։ Ընդ որում, այս ճանապարհի կառուցման շահագրգռվածության մասին են հայտնել ոչ միայն Հայաստանը, այլև Թուրքիան, Ադրբեջանը և Ռուսաստանը:
