Պետք է արձանագրենք, որ մեր բանակն այս քսան տարիների ընթացքում կատարել է ամենակարևոր և վճռական դերը: Այսօր լրագրողների հետ հանդիպմանը այս մասին ասաց ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Հրայր Կարապետյանը:
«Մեր բանակի շնորհիվ ենք հաղթել արցախյան պատերազմում: Այսօր բանակը Հայաստանում ամենակայացած կառույցն է` այն իմաստով, որ կարողանում է հաջողությամբ լուծել իր առջև դրված խնդիրը` հայ ժողովրդի պաշտպանությունը: Բանակն իր տեղում չի դոփում, այլ անընդհատ կատարելագործվում է:
Ամեն ինչ պետք է արվի, որ մեր բանակը տեղում չդոփի: Դրա համար ստեղծվել են բանակային մի շարք կանոնագրքեր. հիմա արդեն պատրաստ է բանակի հիմնական կանոնագիրքը, փոփոխություններ են կատարվել «Զինվորական ծառայության մասին» օրենքում, բազմաթիվ փոփոխություններ են կատարվել նաև «Զինապարտության մասին» օրենքում»,- ասաց նա:
Կարապետյանի խոսքով` բանակում տեղի ունեցող միջադեպերի հարցում էական դեր ունեն սպայական կազմի ու զինվորների միջև հարաբերությունները: «Մենք օրենքով տալիս ենք երաշխիքներ, թե ինչպես պետք է ապահովվի զինվորի պաշտպանվածությունը բանակում: Մեր զինված ուժերն իրենց գործառույթները փայլուն կերպով կատարում են ՀԱՊԿ-ում, խաղաղարար գերազանց առաքելություն են իրականացնում:
Միաժամանակ, բանակում բազմաթիվ չլուծված խնդիրներ կան, այդ թվում` սոցիալական բնույթի` բնակարանային, նպաստների հետ կապված: Մարտական Խաչի շատ հերոսներ նպաստներ ուղղակի չեն ստանում: Այս բոլոր խնդիրների մասին տեղյակ է նաև պաշտպանության նախարարը, և, իհարկե, փորձ է արվում լուծել դրանք»,- ասաց Հրայր Կարապետյանը:
Անդրադառնալով բանակում խաղաղ պայմաններում զոհված զինծառայողների խնդրին` նա ընդգծեց, որ անհրաժեշտ է ձեռնարկել բոլոր քայլերը, որպեսզի այդ զինծառայողների հարազատները իրենց որդիների գործերի արդար քննության հարցում կասկածներ չունենան:
Հրայր Կարապետյանի խոսքով` ամենացավալին այն է, որ բանակում խաղաղ պայմաններում են զինվորները զոհվում: «Ես կողմ եմ հրապարակայնությանը` ժողովուրդը պետք է իմանա այդ միջադեպերի մասին: Հրապարակայնությունը պարտադիր է, մենք չպետք է կոծկենք բանակում կատարվող դեպքերը»: